ەلىمىزدە قانداي ۇلت وكىلدەرى تۇرادى؟

بۇگىن – قازاقستان حالقىنىڭ بىرلىگى كۇنى.

بۇل مەرەكە 1995 جىلدىڭ 18 قازانىندا بەكىتىلگەن، دەپ حابارلايدى Almaty-akshamy.kz

باستاپقىدا بۇل كۇن «قازاقستان حالىقتارىنىڭ بىرلىگى كۇنى» دەپ اتالدى. ول كەزدە قازاقستان حالقى اسسامبلەياسىنىڭ اتاۋىندا دا كوپتىك جالعاۋ بولدى. كەيىنىرەك وزگەرىس ەنگىزىلىپ، كوپتىك جالعاۋ الىندى. ونىڭ ماقساتى – قازاقستان حالقىنىڭ ءبىرتۇتاس ەل ەكەنىن كورسەتۋ.

ەلىمىزدە 1 مامىرعا دەيىن جىل سايىن قازاقستان حالقى اسسامبلەياسىنىڭ وتىرىسى وتەدى. بيىل ۇيىمنىڭ XXXIIءى cەسسياسى 25 ساۋىردە ءوتتى. جيىنعا مەملەكەت باسشىسى قاسىم-جومارت توقايەۆ قاتىستى.

مەملەكەت باسشىسى بۇعان دەيىن ۇيىمنىڭ جۇمىسى تۋرالى اتاپ وتكەن بولاتىن.

«قازاقستان حالقى اسسامبلەياسى – بىرلىگىمىزدى نىعايتۋعا قىزمەت ەتەتىن بىرەگەي قۇرىلىم. اسسامبلەيا قاسيەتتى قازاق جەرىن مەكەن ەتكەن بارشا ەتنوستى ۇيىستىرىپ وتىر. وندا ەڭبەك ەتىپ جۇرگەن ازاماتتاردى بىرلىكتىڭ ەلشىسى دەۋگە بولادى»، - دەدى توقايەۆ.

سونداي-اق ەلىمىزدە ۇلتارالىق بىرلىك پەن دوستىقتى نىعايتۋعا ارنالعان تاعى ءبىر داتا بار. ول – العىس ايتۋ كۇنى. بۇل مەرەكەنى اسسامبلەيا قۇرىلعان كۇنى – 1 ناۋرىزدا مەرەكەلەنەدى.

مەرەكەنىڭ باستى ماقساتىنىڭ ءبىرى – وسكەلەڭ ۇرپاقتى دوستىق، بىر-بىرىنە دەگەن قۇرمەت پەن تولەرانتتىلىققا، وتانسۇيگىشتىككە تاربيەلەۋ، قازاقستاندا ەتنيكارالىق كەلىسىم مەن ۇلتارالىق قارىم-قاتىناستى نىعايتۋ.

ۇلتتىق ستاتيستيكا بيۋروسىنىڭ 2024 جىلدىڭ باسىنداعى ستاتيستيكاسى بويىنشا، قازاقستاندا حالىق سانى 20 033 842 ادام. ەلىمىزدەگى حالىقتىڭ 70 پايىزدان استامى (14 220 321) قازاق ۇلتىنان تۇرادى.

قازاقستان حالقىنىڭ جارتىسىنان استامى (12 451 192 ادام) قالادا تۇرادى، اۋىلداردا تۇراتىن ادامداردىڭ سانى – 7 582 650.

2024 جىل باسىنا ۇلتتىق قۇرامى:

قازاقتار – 14 220 321 ادام (71،0%)
ورىستار - 2 983 317 ادام (14،9%)
وزبەكتەر - 660 564 ادام (3،3%)
ۋكرايندەر - 375 914 (1،8%)
ۇيعىرلار - 301 584 (1،5%)
نەمىستەر - 224 343 (1،1%)
تاتارلار - 219 201 (1،0%)
ءازىربايجاندار - 152 847 (0،7%)
كورەيلەر - 120 262 (0،6%)
تۇرىكتەر - 90 015 (0،4%)
دۇنگەندەر- 83 948 (0،4%)
بەلارۋستار - 75 048 (0،3%)
تاجىكتەر- 55 873 (0،2%)
كۇردتەر- 50 264 (0،2%)
قىرعىزدار- 38 596 (0،1%)
ۇلتىن كورسەتپەگەندەر - 67 263 (0،3%)
باسقا ەتنوستار -52 615 (0،2%)