ەلىمىزدە قايىرىمدىلىق جاساۋشىلارعا قۇرمەتتى اتاق بەرىلەدى

ازاماتتار مەن ۇيىمدارعا قۇرمەتتى اتاق بەرۋ ۇسىنىلادى.

اقپارات جانە قوعامدىق دامۋ مينيسترلىگى قايىرىمدىلىق سالاسىندا قۇرمەتتى اتاق بەرۋ ەرەجەلەرىنىڭ جوباسىن دايىندادى، دەپ حابارلايدى Almaty-akshamy.kz.

قۇرمەتتى اتاق كەلەسى قايىرىمدىلىق سۋبەكتىلەرىنە بەرىلەدى:

• قايىرىمدىلىق جاساۋشىلارعا، قايىرىمدىلىق ۇيىمدارىنا؛


• قايىرىمدىلىق ەرىكتىلەرىنە.

بۇدان باسقا، قايىرىمدىلىق سالاسىن دامىتۋعا ەلەۋلى ۇلەس قوسقان، فيلانتروپيالىق، مەسەناتتىق، دەمەۋشىلىك قىزمەتتى، سونداي-اق كىشى وتانعا كومەك كورسەتۋدى جۇزەگە اسىراتىن ازاماتتار مەن ۇيىمدارعا قۇرمەتتى اتاق بەرۋ ۇسىنىلادى.

قۇرمەتتى اتاق بەرۋ اقپارات جانە قوعامدىق دامۋ ءمينيسترىنىڭ بۇيرىعىمەن قۇرىلعان كوميسسيا شەشىمىنىڭ نەگىزىندە جۇزەگە اسىرىلادى.

كوميسسيا مۇددەلى مەملەكەتتىك ورگانداردىڭ، ۇيىمداردىڭ وكىلدەرىنەن، قوعام قايراتكەرلەرىنەن، ساراپشىلار مەن پارلامەنت دەپۋتاتتارىنان قۇرىلادى.

قۇرمەتتى اتاق بەرۋ تۋرالى ۇسىنىستاردا ۇمىتكەردىڭ جەكە باسىن، جۇمىس تاجىريبەسىن، قايىرىمدىلىق سالاسىن دامىتۋعا قوسقان الەۋمەتتىك ۇلەسىن، ناقتى سىڭىرگەن ەڭبەگىن سيپاتتايتىن دەرەكتەر كورسەتىلەدى.

قۇجات جوباسى 30 ماۋسىمعا دەيىن جاريا تالقىلاۋ ءۇشىن اشىق نقا سايتىندا ورنالاستىرىلعان.