2024 جىلعى 15-16 مامىر ارالىعىندا بارلىق وڭىرلەردە «ءورت-2024» رەسپۋبليكالىق كوماندالىق-شتابتىق وقۋ-جاتتىعۋى وتكىزىلەدى.
بۇل ءىس-شارا تابيعي ورتتەر تۋىنداعان كەزدەگى ءىس-قيمىلدارعا باسقارۋ ورگاندارىنىڭ، ازاماتتىق قورعاۋدىڭ اۋماقتىق كىشى جۇيەسىنىڭ كۇشتەرى مەن قۇرالدارىنىڭ دايىندىق دەڭگەيىن ارتتىرۋ ماقساتىندا ۇيىمداستىرىلدى، دەپ حابارلايدى Almaty-akshamy.kz تجم-گە سىلتەمە جاساپ.
وقۋ-جاتتىعۋدى ۇيلەستىرۋ جونىندەگى رەسپۋبليكالىق شتاب قازاقستان رەسپۋبليكاسىنىڭ توتەنشە جاعدايلار ۆيسە-مينيسترى گەنەرال-مايور ەرلان نۇرپەيىسوۆتىڭ باسشىلىعىمەن اباي وبلىسىنىڭ «سەمەي ورمانى موتر» رمم بورودۋليحا فيليالىنىڭ اۋماعىندا ورنالاسقان.
وقۋ-جاتتىعۋ شەڭبەرىندە ەكى كۇن ىشىندە بارلىق وڭىرلەردە پروفيلاكتيكالىق ءىس-شارالار كەشەنى، سونداي-اق ءاربىر ۆەدومستۆو ءۇشىن جەكە ايقىندالعان ءتيىستى كىرىسپەلەر بويىنشا ازاماتتىق قورعاۋ قىزمەتتەرىمەن جانە قۇرالىمدارىمەن پراكتيكالىق ءىس-قيمىلدار جۇرگىزىلەدى.
رەسپۋبليكالىق شتاب تابيعي سيپاتتاعى توتەنشە جاعدايلارعا جەدەل دەن قويۋ ءۇشىن باسقا وبلىستاردان كۇشتەر مەن قۇرالداردى تارتۋ جونىندەگى الگوريتمدى پىسىقتايدى.