ەلىمىزدە ونكولوگيالىق دەرتتەر اۋرۋدىڭ ەكىنشى ساتىسىندا انىقتالادى

2021 جىلدان بەرى قاتەرلى ىسىككە شالدىققان ناۋقاستارعا 12 848 وتا جاسالعان.

بۇل تۋرالى دەنساۋلىق ساقتاۋ مينيسترلىگى مەديسينالىق كومەكتى ۇيىمداستىرۋ دەپارتامەنتىنىڭ ديرەكتورى ازامات دۇيسەنوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«حيرۋرگيالىق ارالاسۋ قاتەرلى ىسىكتەردى ەمدەۋدىڭ نەگىزگى ادىستەرىنىڭ ءبىرى سانالادى جانە ءىس جۇزىندە بارلىق ونكولوگيالىق ناۋقاستارعا ءتۇرلى كولەمدە جانە ساۋلەلىك، حيميوتەراپيامەن ءارتۇرلى كومبيناسيادا جاسالادى. تەك حيرۋرگيالىق ەمدەۋ كوبىنە ونكولوگيالىق اۋرۋدىڭ ەرتە ساتىسىندا جاسالادى. 2021 جىلى تەك حيرۋرگيالىق ەم العان پاسيەنتتەردىڭ سانى 5 306 ادامدى قۇرادى. ونىڭ ىشىندە العاش وسىنداي دەرت انىقتالعان ناۋقاستاردىڭ ۇلەسى – 15،1 پايىز.

2022 جىلى 4 965 ادامعا وتا جاسالدى، وندا العاش انىقتالعانداردىڭ سانى – 13 پايىز. ال 2023 جىلدىڭ 6 ايىنداعى كەزەڭدە تەك حيرۋرگيالىق ەم العان پاسيەنتتەر سانى 2 577 (العاش انىقتالعانداردىڭ ۇلەسى -12،9%) قۇرادى»، - دەپ جاۋاپ بەرگەن ازامات دۇيسەنوۆ.

ونىڭ دەرەگىنشە، قازاقستاندا ونكولوگيالىق دەرتتەر كوبىنە ەكىنشى ساتىدا انىقتالادى.

«قازاقستاندا كوبىنەسە قاتەرلى ىسىكتەر قاتەرلى پروسەستىڭ II ساتىسىندا دياگنوز قويىلادى. مۇندايلاردىڭ ۇلەسى 2021 جىلى – 31،9%، 2022 جىلى 30،3% قۇرادى»، - دەلىنگەن جاۋاپتا.