ەلىمىزدە وڭ ءرۋلدى كولىكتەردى زاڭداستىرۋعا مۇمكىندىك بەرىلەدى

بۇعان دەيىن ءىىم كولىكتى باستاپقى تىركەۋ ءۇشىن 200 000 تەڭگە تولەيتىنىن ايتقان.

قازاقستاندىقتار وڭ ءرۋلدى شەتەلدىك كولىكتەردى ءبىر رەت زاڭداستىراتىن بولادى، دەپ حابارلايدى Almaty-akshamy.kz

بۇل تۋرالى ق ر ءىىم اكىمشىلىك پوليسيا كوميتەتىنىڭ ءتوراعاسى مىندەتىن اتقارۋشى قايسار سۇلتانبايەۆ ءمالىم ەتتى.

ءتيىستى ماسەلەنى سەناتتىڭ جالپى وتىرىسىندا دەپۋتات نۇرلان بەكنازاروۆ كوتەردى. ونىڭ ايتۋىنشا، بۇگىندە قازاقستاندا وڭ ءرۋلدى كولىكتەردىڭ جۇرۋىنە زاڭنامالىق تىيىم سالىنعان. سونىمەن قاتار، كەيبىر ازاماتتار وڭ ءرۋلدى شەتەلدىك ءنومىرلى كولىكتەردى اكەلىپ، ءقازىر تىركەي الماي جاتىر.

بۇل رەتتە ول مەملەكەت باسشىسىنىڭ جولداۋىنداعى تاپسىرماسىنا ساي، 2022 جىلدىڭ 1 قىركۇيەگىنە دەيىن قازاقستانعا اكەلىنگەن جانە مەملەكەتتىك تىركەۋدەن وتپەگەن شەتەلدىك اۆتوكولىكتەردى زاڭعا سايكەس ءبىر رەتتىك زاڭداستىرۋ مىندەتىن قويعانىن ەسكە سالدى.

«بۇگىنگى كۇنى مەملەكەت باسشىسىنىڭ تاپسىرماسىنا بايلانىستى ءبىز كولىك قۇرالدارىن ءبىرجولعى تىركەۋ بويىنشا جۇمىس ىستەپ جاتىرمىز، جاقىندا عانا وڭ ءرۋلدى كولىكتەر ءبىر رەتتىك زاڭداستىرۋعا ەنگىزىلەتىنى تۋرالى ءتيىستى تۇزەتۋلەر ەنگىزدىك. ءقازىر مۇنداي كولىكتەردىڭ سانى 20 مىڭعا جۋىق»، - دەدى قايسار سۇلتانبايەۆ.