قازاقستاندا كوممۋنالدىق تاريفتەر قىمباتتايدى

بۇل تۋرالى ۇلتتىق ەكونوميكا ءمينيسترى الىبەك قۋانتىروۆ مالىمدەدى.

تاريفتەر ءاربىر وڭىردەگى ينجەنەرلىك جەلىلەردىڭ توزۋىنا قاراي 20-30 پايىزعا كوتەرىلەدى، دەپ حابارلايدى Almaty-akshamy.kz

ەلىمىز بويىنشا توزعان ينجەنەرلىك جەلىلەر كوپ، بۇل كورسەتكىش كەيبىر قالالاردا 80 پايىزعا دەيىن جەتكەن. مۇنىڭ بارلىعىن ءتاريفتىڭ ەسەبىنەن جاڭارتۋ جوسپارلانىپ وتىر.

«كەلەسى جىلدا، شامامەن، ەكىنشى جارتىجىلدىقتان باستاپ تاريف جاعىنان وزگەرىستەر بولادى. سەبەبى جەكە مەنشىك سۋبەكتىلەرگە، سودان كەيىن مەملەكەتتىك مەنشىكتە بولاتىن سۋبەكتىلەرگە جەلىلەردى جاڭارتۋ كەرەك. وزدەرىڭىزگە ءمالىم، پرەزيدەنت ءوزىنىڭ سايلاۋالدى باعدارلاماسىندا ناقتى مىندەت قويدى، جەلىلەردىڭ توزۋىن، كەمىندە، 15 پايىزعا تومەندەتۋ كەرەك. ءبىز جەلىلەردىڭ توزۋ كورسەتكىشىن، شامامەن، 15-20 پايىزعا تومەندەتەمىز. تاريف كوتەرىلەدى، باسقا جول جوق»، - دەدى قۋانتىروۆ.

ءمينيستردىڭ ايتۋىنشا، ءاربىر قالاداعى جەلىلەر مەن نىساندار جان-جاقتى زەردەلەنەدى. سوعان قاراي تاريفتەر دە كوتەرىلەدى.

«مىسالى، ەكىباستۇزدا ءتاريفتى 2،5 ەسەگە كوتەرۋگە ۇسىنىس بەرىلدى. ارينە، ول مۇمكىن ەمەس. ءبىراق ءبىز حالىقتىڭ جاعدايىنا قاراي ءتاريفتى كوتەرۋ ماسەلەسىن تالقىلايمىز»، - دەپ اتاپ كورسەتتى قۋانتىروۆ.

ءتاريفتى كوتەرۋ باعدارلاماسى جەتى جىلعا ەسەپتەلگەن. وسى ۋاقىتتىڭ ىشىندە تاريفتەر بىرتىندەپ جوعارىلايدى.

«كەلەسى جىلى ءبىر بولىگى وسەدى. بالكىم، 20 نەمەسە 30 پايىزعا، جالپى رەسپۋبليكا بويىنشا ەمەس. ءاربىر قالاداعى نىساندار مەن جەلىلەردىڭ جاعدايىنا قاراي ەسەپتەلەدى»، - دەدى مينيستر.