كەيىنگى اپتالاردا ەل ىشىندە سۋيسيد دەرەكتەرى جيىلەپ، قوعامنىڭ ۇرەيىن كۇشەيتتى. بۇل وقيعالار سۋيسيد ماسەلەسىنىڭ تەرەڭدە جاتقانىن، ونى تەك فاكت رەتىندە ەمەس، ادام جانىنىڭ دابىلى رەتىندە قابىلداۋىمىز كەرەك ەكەنىن كورسەتىپ وتىر. وسى ورايدا اqshamnews.kz ءتىلشىسى پسيحولوگ مامانمەن سۇحباتتاسىپ، سۋيسيدكە يتەرمەلەيتىن فاكتورلار مەن الدىن الۋ جولدارىن ءسوز ەتتى.
ۇلمەكەن ساندىبەك قىزى
پسيحولوگ، گەشتالت-تەراپيەۆت
"ءسۋيسيدتىڭ تۇپكى سەبەبى – شاراسىزدىق پەن جالعىزدىق"
پسيحولوگ ۇلمەكەن ساندىبەك قىزىنىڭ ايتۋىنشا، سۋيسيدكە كوبىنە جالعىزدىق، جاقىندارىنان قولداۋ كورمەۋ، قارجىلىق قىسىم، اجىراسۋ، نەمەسە جاقىنىن جوعالتۋ سياقتى اۋىر ەموسيونالدىق ساتتەر يتەرمەلەيدى.
"ادام تىعىرىققا تىرەلگەندە، بۇل كۇيدەن شىعاتىن جول جوق دەپ ويلايدى. ۇزاق ۋاقىتقا سوزىلعان كۇيزەلىس، پسيحيكالىق اۋىتقۋشىلىق، وتباسىنداعى قيىندىقتار - بۇلاردىڭ ءبارى ادامدى ومىردەن تۇڭىلۋگە يتەرمەلەيدى. قوبالجۋ، قورقىنىش سەزىمدەرى قاتار جۇرەدى"، – دەيدى مامان.
سۋيسيدكە باراتىن ادامنىڭ پسيحولوگياسىنان قانداي بەلگىلەر بايقالادى؟
سۋيسيدكە باراتىن ادام كوبىنە بۇل شەشىمدى ىشىنەن ءپىسىرىپ، دايىندالا باستايدى. ونىڭ ويىندا "مەنىڭ ءومىرىمنىڭ ءمانى جوق"، "شارشادىم"، "ومىردەن ءتۇڭىلدىم" دەگەن سەكىلدى سوزدەر قايتالانادى.
"مۇنداي ادام كوپ وقشاۋلانىپ، ۇزاق ۋاقىت جالعىز وتىرادى. كوڭىلسىزدىك پەن ەنجارلىق - باستى بەلگىلەر. مۇنداي ساتتە جاقىنىنىڭ زەيىنى مەن نازارى – ماڭىزدى"، – دەيدى پسيحولوگ.
"سويلەسكىسى كەلگەن ادامعا تىڭدار قۇلاق كەرەك"
ەگەر جاقىن ادامىڭىز سىزگە سۋيسيد جايلى ويلارىمەن بولىسسە، ونى قورقىتپاي، ۇيالتپاي، كەرىسىنشە جىلى قابىلداۋ كەرەك.
"ەڭ باستىسى – سىزگە ارقا سۇيەي الاتىنىن، جالعىز ەمەس ەكەنىن سەزىندىرۋ. "ولاي ويلاما!" دەپ بىردەن تەجەۋ ءقاۋىپتى. بۇل ادامدى ودان سايىن تۇيىقتاپ جىبەرۋى مۇمكىن. ونىڭ ورنىنا تىڭداپ، قولداپ، ومىردە كەزدەسكەن قيىندىقتاردى ەڭسەرە العانىن ەسكە سالعان ءجون. وعان كۇش-جىگەرى جەتەتىنىن، ءوز ومىرىنە ءوزى جاۋاپ بەرە الاتىنىن ءتۇسىندىرۋ كەرەك"، – دەيدى مامان.
پسيحولوگتىڭ كومەگىن قالاي ۇسىنۋ كەرەك؟
جاقىنىڭىزدىڭ جاعدايى الاڭداتسا، بىردەن "پسيحولوگقا بار" دەپ تالاپ ەتۋدىڭ ورنىنا، جىلى ۇسىنىس جاساڭىز.
"ادام ءوزى شەشىم قابىلداۋى ءتيىس. ەگەر ول مۇلدە جۇگىنگىسى كەلمەسە - بۇل دا ونىڭ تاڭداۋى. ءبىراق ءۇمىت ۇزىلمەگەنى دۇرىس. جاعىمدى ورتا، سەنىم مەن بايلانىس ادامدى كوپ نارسەدەن ساقتاي الادى"، – دەيدى پسيحولوگ.
قازاقستاندا سۋيسيد نەگە جيىلەپ كەتتى؟
مامان قازىرگى ۋاقىتتا بۋللينگ، وتباسىنداعى زورلىق-زومبىلىق، ەسىرتكىگە تاۋەلدىلىك پەن لۋدومانيانىڭ بەلەڭ الۋى سۋيسيدكە اسەر ەتەتىنىن ايتادى.
"ەگەر وسى ماسەلەلەردىڭ الدىن الىپ، قوعامعا ءسۋيسيدتىڭ شەشىم ەمەس ەكەنىن تۇسىندىرە الساق، بۇل كورسەتكىش ءبىرشاما تومەندەر ەدى. ول ءۇشىن ەڭ الدىمەن پسيحولوگيالىق اعارتۋ جۇمىستارى قاجەت»، – دەيدى پسيحولوگ.
سۋيسيدتەن كەيىن ادام قوعامنان الىستاپ، ەسكى تانىستارىنان قول ءۇزىپ جاتادى.
"قوعام مۇنداي جاعدايدا ادامنىڭ وزىنە ءجيى كۇيە جاعادى. ءبىراق ادام بۇل ءساتتى الدىمەن ءوزى قابىلداپ، ءوزىن كەشىرۋى كەرەك. قوعامدى وزگەرتۋ قيىن. سول سەبەپتى ىشكى يممۋنيتەتتى قالىپتاستىرعان الدەقايدا ءتيىمدى"، – دەيدى مامان.