قازاقستاندا مۇگەدەك ەكەنىن راستاۋ پروسەسى جەڭىلدەي تۇسپەك.
ەندى قاعاز تاسىپ، مەكەمە ارالاۋدىڭ قاجەتى بولمايدى. بۇل تۋرالى ورتالىق كوممۋنيكاسيالىق قىزمەتى الاڭىندا وتكەن بريفينگ بارىسىندا ايتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىز ەڭبەك جانە الەۋمەتتىك قورعاۋ مينيسترلىگىمەن بىرلەسىپ ەكى جىل بويى مۇگەدەكتىكتى سىرتتاي كۋالاندىرۋ بويىنشا پيلوتتىق جوبانى ىسكە اسىرىپ كەلەمىز. وسى جۇمىس اياسىندا ءبىز ارىپتەستەرىمىزبەن بىرگە مەديسينالىق-الەۋمەتتىك ساراپتاما جۇرگىزىلەتىن ورگاندارعا قاعاز تۇرىندە ۇسىنىلۋى قاجەت ءبىرقاتار قۇجات سانىن قىسقارتتىق. بۇل باعىتتا الدىمەن پرواكتيۆتى رەجيمگە اۋىستىرىلاتىن نوزولوگيالاردىڭ ءتىزىمىن كەڭەيتەتىن بولامىز. ياعني مەديسينالىق-الەۋمەتتىك ساراپتاما قۇرىلىمدارىنا تىكەلەي بارۋدىڭ قاجەتى بولمايدى. وسىلايشا مۇگەدەكتىكتى راستاۋ ءۇشىن جۇگىرىس ازايا تۇسپەك»، - دەدى دەنساۋلىق ساقتاۋ ۆيسە-مينيسترى بەيبىت ەسەنبايەۆ.
ايتا كەتسەك، ەندى قازاقستاندىقتار رەسەپت بويىنشا دارىلەردى QR كود ارقىلى الادى.
اتالعان قىزمەت ازىرگە پيلوت جوبا رەتىندە ەلوردا ەمحانالارىندا ىسكە قوسىلدى. جىل سوڭىنا دەيىن باسقا دا وڭىرلەردە ىسكە قوسۋ جوسپارلانىپ وتىر.