الماتى پوليسەيلەرى ءتورت قالتا ۇرىسىن قولعا ءتۇسىردى

مەرەكە كۇندەرى قالتا ۇرىلارى قاراپ قالمادى

وتكەن مەرەكەدە قوعامدىق ورىنداردا ادامداردىڭ كوپ شوعىرلاناتىنىن جاقسى بىلەتىن قالتا ۇرىلارى قاراپ وتىرماعان ءتارىزدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

«الماتى ارباتىندا بوتەننىڭ قالتاسىنان Samsung تەلەفونىن جىمقىرعان 37 جاستاعى م.ەسىمدى ازاماتتى جەدەل ۋاكىلدەر قولعا ءتۇسىردى. ال بۇل ۋاقىتتا قالانىڭ ورتالىق ساياباعىندا بۇرىن سوتتى بولعان 34 جاستاعى ب.ەسىمدى ازاماتشا ءوزىنىڭ سىڭىلىسىمەن وزگەنىڭ IPhone تەلەفونىن ۇرلاعان. قازىرگى تاڭدا اتالعان ەكى دەرەك بويىنشا قىلمىستىق ءىس قوزعالدى. كۇدىكتىلەر قاماۋعا الىندى»، – دەدى الماتى قالاسى پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

سونداي-اق ۇستالعان كۇدىكتىلەردىڭ وسى ىسپەتتەس وزگە دە قىلمىسقا قاتىسى بار-جوعى انىقتالىپ جاتىر. تاركىلەنگەن تەلەفوندار ايعاق زات رەتىندە تىركەلدى. ق ر قپك-نىڭ 201-بابىنا سايكەس وزگە اقپاراتتار تەرگەۋ مۇددەسىنە وراي جاريالاۋعا جاتپايدى. ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىق بۇزۋشىلىق جاساۋدا كىناسىز دەپ تانىلادى.