ينتەرنەتتى قوسۋ - وتە قىمبات پروسەدۋرا.
ەلدەگى ينتەرنەت جىلدامدىعى ءبىر جىل ىشىندە 22% ارتقان، دەپ حابارلايدى Almaty-akshamy.kz finprom.kz سايتىنا سىلتەمە جاساپ.
قازاقستان ءموبيلدى ينتەرنەت جىلدامدىعى بويىنشا الەم ەلدەرى رەيتينگىندە التى ساتىعا كوتەرىلدى.
كەيىنگى ونجىلدىقتا ينتەرنەت ادام ءومىرىنىڭ بارلىق سالالارىنا دەندەپ ەندى. COVID-19 پاندەمياسى كەزىندە بۇكىل الەم قاشىقتان جۇمىس ىستەپ، وقۋ وقىپ، قىزمەت كورسەتە باستاعاندا ءتىپتى ەرەكشە ماڭىزعا يە بولدى.
قازاقستاندا، بۇكىل الەمدەگى سياقتى، ءموبيلدى ينتەرنەتتىڭ جىلدامدىعىنا ەرەكشە كوڭىل بولىنەدى. Speedtest Global Index دەرەكتەرىنە سايكەس، 2022 جىلعى ماۋسىمدا ءموبيلدى ينتەرنەت جىلدامدىعى بويىنشا ەلدەر رەيتينگىندە قازاقستان التى ساتىعا كوتەرىلدى. كورسەتكىش ءبىر ايدا 20،56 مب/س-تان 22،53 مب/س-قا دەيىن ۇلعايدى.
قازاقستاندا ينتەرنەت رەسەي، قىرعىزستان، وزبەكستان، بەلارۋس جانە باسقا دا كوپتەگەن دامۋشى ەلدەرگە قاراعاندا ايتارلىقتاي جىلدام.
بۇل رەتتە الەمدەگى ينتەرنەت جىلدامدىعى بويىنشا كوشباسشىلار نورۆەگيا، ءباا، بولگاريا، وڭتۇستىك كورەيا جانە كاتار بولىپ تابىلادى.
ەلىمىزدە ءموبيلدى ينتەرنەتتىڭ جىلدامدىعى ينتەرنەت-ترافيكتى تۇتىنۋدىڭ ۇلعايۋىمەن قاتار ءوسىپ كەلە جاتقانىن اتاپ وتكەن ءجون. 2021 جىلى Tele2/Altel جەلىسى ىشىندە ينتەرنەت-ترافيكتى تۇتىنۋ 33% — عا ءوستى، 1985 پەتابايتقا دەيىن (نەمەسە شامامەن 2 ەكسابايت) - بۇل بارلىق ۇيالى بايلانىس وپەراتورلارى اراسىندا رەكوردتىق ءمان. ساراپشىلاردىڭ ەسەپتەۋىنشە، Tele2/Altel ابونەنتتەرى ەلدىڭ ءموبيلدى ينتەرنەتىن تۇتىنۋدىڭ جالپى كولەمىنىڭ 60% - ىن قۇرايدى. سونىمەن قاتار، Kcell-دە ترافيكتى تۇتىنۋدىڭ ءوسۋى 36،8% - دى، 620 پەتابايتقا دەيىن قۇرادى. ياعني، ەفير جۇكتەمەسىنىڭ وسۋىمەن ەلدەگى ينتەرنەت جىلدامدىعى ارتىپ كەلەدى، بۇل ۇيالى بايلانىس وپەراتورلارىنىڭ ينفراقۇرىلىمىن دامىتۋدى كورسەتەدى.
ينتەرنەتتىڭ دامۋىنا ەل اۋماعى ايتارلىقتاي اسەر ەتەدى. جەر كولەمى نەعۇرلىم ۇلكەن بولسا، كابەلدىك سىمداردى جاڭارتۋ سوعۇرلىم قىمبات بولادى. تيىسىنشە، قازاقستاندا ينتەرنەتتى قوسۋ وتە قىمبات پروسەدۋرا. ينفراقۇرىلىم يمپورتتالاتىندىقتان، ول دا باعاعا اسەر ەتەدى.
ينفراقۇرىلىمدى دامىتۋ مەن جاڭعىرتۋعا نەگىزىنەن بايلانىس وپەراتورلارىنىڭ وزدەرى ءوز قاراجاتىن سالادى. جالپى، 2020 جانە 2021 جىلدارى بايلانىس سەكتورىنا ينۆەستيسيالاردىڭ رەكوردتىق كولەمى سالىنعان: 140،9 ملرد جانە 128،6 ملرد تەڭگە.