الماتىدا ازاماتتىق باستامالاردى قولداۋ ورتالىعىنىڭ ۇيىمداستىرۋىمەن «تەاتر» نوميناسياسىنداعى فەستيۆال-بايقاۋى ءوتتى
تەاتر - كەز كەلگەن حالىقتىڭ، ارينە، سونىڭ ىشىندە قازاق حالقىنىڭ دا رۋحاني بولمىسىنىڭ، مادەنيەتىنىڭ، دۇنيەتانىمىنىڭ تۇعىرى بيىك اسىل مۇراسى. حالىقتى ەستەتيكالىق ادامگەرشىلىك پەن ىزگىلىككە تاربيەلەۋدىڭ اسا ماڭىزدى قۇرالى دا وسى – تەاتر. وسى ورايدا، پەداگوگيكالىق عىلىمدار اكادەمياسى اقپارات جانە قوعامدىق دامۋ مينيسترلىگىنىڭ تاپسىرىسى بويىنشا جانە ازاماتتىق باستامالاردى قولداۋ ورتالىعىنىڭ ۇيىمداستىرۋىمەن «تەاتر» نوميناسياسىنداعى فەستيۆال-بايقاۋىن وتكىزدى.
بايقاۋ اشىق تۇردە ۇيىمداستىرىلدى. ءىس-شاراعا 16–29 جاس ارالىعىنداعى جاس تالانتتار قاتىستى. ونىڭ ىشىندە، مەكتەپ، ۋنيۆەرسيتەت جاندارىنداعى تەاتر ۇجىمدارى، ونەر بىرلەستىكتەرى، جاس تەاترلار دا بارشىلىق. ولار ەلىمىزدىڭ تۇكپىر-تۇكپىرىنەن جينالعان ساڭلاقتار دەسەك، ارتىق ايتپاعانىمىز بولار. بايقاۋعا ەلىمىزگە تانىمال تەاتر مايتالماندارى، اكتەرلار تورەلىك ەتتى.
ۇيىمداستىرۋشىلاردىڭ ايتۋىنشا، جاستار اراسىندا تەاتر ونەرىن ناسيحاتتاۋ، ونەرگە قىزىعۋشىلىق تانىتقان جاستاردىڭ شىعارماشىلىق الەۋەتىن قولداۋ جانە دامىتۋ، جاس ونەرتانۋشىلار مەن تەاتر ونەرپازدارىنان قۇرالعان توپتاردىڭ جاڭا ەسىمدەرىن انىقتاۋ، ولاردىڭ شىعارماشىلىعىن قولداۋ باستى ماقساتقا اينالدى.
اتالمىش بايقاۋدا 1-ورىندى نۇر-سۇلتان قالاسىنان كەلگەن ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ جانىنان قۇرىلعان «شاڭىراق» تەاترى يەلەندى. جۇلدەلى 2-ورىندى الماتى قالاسىنداعى «جاسارت» ونەر بىرلەستىگى جەڭىپ الدى. 3-ورىندى ە.ا.بوكەتوۆ اتىنداعى قاراعاندى ۋنيۆەرسيتەتىنىڭ فيلوسوفيا جانە پسيحولوگيا فاكۋلتەتىنىڭ «مادەني تىنىعۋ قىزمەتى» ماماندىعىنىڭ ستۋدەنتتەرىنەن قۇرالعان «ۇركەر» ستۋدەنتتەر تەاترى يەلەندى.
اتالعان شارا م.اۋەزوۆ اتىنداعى قازاق ۇلتتىق دراما تەاترىنىڭ كىشى زالىندا ءوتتى.