جاڭا جىلدان باستاپ ءموبيلدى اۋدارىمدى مەملەكەتتىك كىرىستەر كوميتەتى باقىلايدى، دەپ حابارلايدى اlmaty-akshamy.kz.
ەگەر ايىنا ءبىر شوتقا جۇزدەن استام اۋدارىم جاسالسا جانە وسىنداي كورسەتكىش ءۇش اي قاتارىنان قايتالانسا، مەملەكەتتىك كىرىستەر كوميتەتى جەكە تۇلعادان سالىق تالاپ ەتۋگە قۇقىلى.
مەملەكەتتىك كىرىستەر كوميتەتىنىڭ مالىمەتىنشە، ازىرگە بۇل مەملەكەتتىك قىزمەتكەرلەر مەن ولاردىڭ جۇبايىنىڭ شوتىنا تۇسكەن اقشاعا قاتىستى. ال ەكىنشى كەزەڭگە كۆازيمەملەكەتتىك سالا قىزمەتكەرلەرى ىلىگەدى.
2025 جىلى ءۇشىنشى كەزەڭدە جەكە كاسىپكەرلەردىڭ ءموبيلدى اۋدارىمدارىن باقىلايدى. 2026 جىلدان باستاپ بارلىق قازاقستاندىقتىڭ اقشالاي اۋدارىمى تۋرالى مالىمەت كوميتەتتىڭ قاراۋىنا تۇسەدى.
مەملەكەت كىرىستەرى كوميتەتىنىڭ ءتوراعاسى دانيار ءجانالىنوۆ: "تاكسيستەر بار بىزدە، Yandex، InDriver، Uber، قوسىمشا تاعى باسقا ءوزىن-وزى جۇمىسپەن قامتاماسىز ەتىپ جاتقان ادامدار بار. وسى پلاتفورمالارمەن ءبىز قازىرگى كۇنى كەلىسىمگە كەلىپ جاتىرمىز. الىناتىن اقشا، ءبارى باقىلاۋدا بولادى. پلاتفورمالاردىڭ جۇيەسى ارقىلى وتەتىن بولادى. سول كەزدە قانشاما تابىسى بار، پلاتفورما ءوزى ساناپ، سالىعىن ءبىزدىڭ ورگانعا، بيۋدجەتكە اۋدارىپ وتىرادى. سالىق تولەۋشى ونى بىلمەيدى، وعان قولايسىزدىق تۋدىرمايدى"، – دەيدى.