قۇقىق قورعاۋ ورگاندارىنىڭ جۇمىسىنا شاعىمدار ءتۇسىپ جاتىر
بۇل تۋرالى مەملەكەت باسشىسى قاسىم-جومارت توقايەۆ وتاندىق بيزنەس وكىلدەرىمەن كەزدەسۋى كەزىندە ايتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
«مەملەكەت باسشىسى رەتىندە مەن بارلىعىنا ءادىل ويىن ەرەجەلەرى بار اشىق ەكونوميكا قۇرۋ ساياساتىن جالعاستىرامىن. ءبىز جىلى ورىندار مەن لاۋازىمداردى قايتا بولۋگە جول بەرمەيمىز»، - دەدى قاسىم-جومارت توقايەۆ.
پرەزيدەنت ءقازىر قۇقىق قورعاۋ ورگاندارىنىڭ جۇمىسىنا شاعىمدار ءتۇسىپ جاتقانىنان حاباردار ەكەنىن ايتتى.
«ءتارتىپتى قالپىنا كەلتىرۋ بارىسىندا ولار ەسكى ادىسپەن جۇمىس ىستەپ، بىلايشا ايتقاندا، لايىقتى بيزنەسپەن اينالىسا الادى. سوندىقتان «ۇلكەن ىستەر شىعىنسىز مۇمكىن ەمەس» دەگەن قاعيدا بۇل جەردە جۇمىس ىستەمەيتىنىن اشىق ايتامىن. ەگەر مۇنداي فاكتىلەر انىقتالسا، ءاربىر جاعداي بويىنشا ارنايى تەكسەرۋ شارالارى جۇرگىزىلەدى، ءتيىستى باعا بەرىلەدى»، - دەپ ءتۇسىندىردى توقايەۆ.
مەملەكەت باسشىسى 2019 جىلعى جولداۋىندا كاسىپكەرلىككە زاڭسىز كەدەرگى جاساۋدى مەملەكەت مۇددەسىنە قارسى قىلمىس دەپ ساناۋ كەرەگىن ايتقانىن ەسكە سالدى.
«بۇل باس پروكۋراتۋرانىڭ جۇمىسى. الاياقتارمەن كۇرەسۋ كەرەك، تاعى دا قايتالاپ ايتامىن الاياق، افەريستەرمەن كۇرەسۋ كەرەك. ءبىراق ءبىز ەمنىڭ اۋرۋدان جامان بولۋىنا جول بەرمەۋىمىز كەرەك. ەلىمىزدە «كرىشا»، «رەيدەرلىك» دەگەندەر بولماۋى كەرەك. ەگەر بيزنەس ادال جۇمىس ىستەۋگە دايىن بولسا جانە ول كرەاتيۆتى جانە زاماناۋي ۇلگىدە بولسا، ءبىز ونى قولداپ، ۇلتتىق ەكونوميكانىڭ جاڭا مودەلىنە ەنۋىنە كومەكتەسۋىمىز كەرەك»، - دەپ ءتۇسىندىردى قاسىم-جومارت توقايەۆ.