سوڭعى اپتادا 16 ميلليوننان استام ادام كوروناۆيرۋس ينفەكسياسىن جۇقتىردى، 74 مىڭنان استامى قايتىس بولدى.
دۇنيەجۇزىلىك دەنساۋلىق ساقتاۋ ۇيىمى (ددسۇ) سەيسەنبى كۇنى كەشكە كوۆيد جۇقتىرعاندار سانى الدىڭعى جەتى كۇنمەن سالىستىرعاندا 19%-عا ازايىپ، ال قايتىس بولعاندار سانى 4%-عا وسكەنىن مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ونىڭ اپتالىق بيۋللەتەنىندە كورسەتىلگەندەي، 7-13 اقپان ارالىعىندا COVID-19 ۆيرۋسىن جۇقتىرۋشىلار سانى وتكەن اپتامەن سالىستىرعاندا 19%-عا ازايدى. ۇيىم 16 097 642 ادام كوۆيد جۇقتىرعانى تۋرالى حابارلاما الدى. 74 494 ءولىم تىركەلدى، بۇل الدىڭعى جەتى كۇنمەن سالىستىرعاندا 4%-عا ارتىق.
وتكەن اپتامەن سالىستىرعاندا (31 قاڭتار – 6 اقپان) ۆيرۋس جۇقتىرعاندار سانىنىڭ ارتۋى تىنىق مۇحيتىنىڭ باتىس ايماعىندا (19%-عا) تىركەلدى. سونىمەن بىرگە ددۇ-نىڭ قالعان بەس ايماعىندا اۋرۋشاڭدىق تومەندەدى. اسىرەسە ايتارلىقتاي تومەندەۋ وڭتۇستىك-شىعىس ازيادا (37%-عا)، امەريكادا (32%-عا) جانە افريكادا (30%-عا) تىركەلدى.
ءبىر اپتادا الەمدە جاڭا ينفەكسيالاردىڭ 60%-ىن قۇرايتىن ەۋروپادا بۇل كورسەتكىش 16%-عا تومەندەگەن. ءولىم-جىتىم شىعىس جەرورتا تەڭىزىندە (38%-عا)، باتىس تىنىق مۇحيتىندا (27%-عا)، افريكادا (14%-عا)، امەريكادا (5%-عا) جانە ەۋروپادا (1%-عا) ءوستى. بۇل رەتتە وڭتۇستىك-شىعىس ازيادا 9%-عا تومەندەدى. رەسەيدە ءبىر اپتاداعى ەڭ كوپ ينفەكسيا جۇقتىرۋ (1 323 391) جاعدايى تىركەلدى. ودان كەيىن گەرمانيا (1 322 071)، اقش (1 237 530)، برازيليا (1 009 678) جانە فرانسيا (979 228). امەريكا قۇراما شتاتتارىندا جەتى كۇندە ەڭ كوپ ءولىم-جىتىم تىركەلگەن (17 225).
ودان كەيىن ءۇندىستان (6686)، برازيليا (6658)، رەسەي (4834) جانە مەكسيكا (2530). ددۇ مالىمەتى بويىنشا، 15 اقپاندا ماسكەۋ ۋاقىتىمەن 19:50-دە ۇيىم 412 351 279 ۆيرۋس جۇقتىرعان جانە 5 821 004 ادام قايتىس بولعانى تۋرالى اقپارات العان. ۆيرۋس جۇقتىرعاندار سانى ءبىر تاۋلىكتە 1 469 326-عا، قايتىس بولعاندار 7 351-گە وسكەن.