ونەردە شەكارا جوق. جاقىندا سانكت-پەتەربۋرگ سىرتقى بايلانىستار كوميتەتىنىڭ باستاماسىمەن جانە رەسەي ىنتىماقتاستىعىنىڭ قولداۋىمەن سانكت-پەتەربۋرگتە «مۇراجاي تاجىريبەلەرى: ساقتاۋدان باستاپ قاتىسۋعا دەيىن» اتتى كاسىبي دامۋ باعدارلاماسى ۇيىمداستىرىلدى. بۇل باعدارلاماعا الماتىداعى ءابىلحان قاستەيەۆ اتىنداعى ق ر مەملەكەتتىك ونەر مۋزەيىنىڭ قىزمەتكەرلەرى دە قاتىستى، دەپ حابارلايدى aqshamnews.kz
سانكت-پەتەربۋرگ سىرتقى بايلانىستار كوميتەتىنىڭ شاقىرۋىمەن قازاقستان، بەلارۋس، تاجىكستان، ارمەنيا، ءازىربايجان جانە وڭتۇستىك وسەتيا ەلدەرىنىڭ 21 مۇراجايىنان 34 مامان جينالدى. ولار ءبىر اپتا بويى سانكت-پەتەربۋرگتىڭ مادەني مەكەمەلەرىنىڭ جۇمىسىن زەرتتەپ، ۇزدىك تاجىريبەلەرىمەن تانىسۋعا مۇمكىندىك الدى.
باعدارلاما بارىسىندا رەسەيدىڭ ساياسي تاريحى مەملەكەتتىك مۋزەيى نەگىزىندە قاتىسۋشىلار ءۇشىن دارىستەر، شەبەرلىك سىنىپتارى جانە سەمينارلار وتكىزىلدى. تاقىرىپتار قاتارىندا مۇراجاي قىزمەتىن ەسەپكە الۋ جانە ساقتاۋ، مۇراجاي زاتتارى مەن كوللەكسيالارىن سيفرلاندىرۋ، ەكسپوناتتاردى سيپاتتاۋ ادىستەرى، حالىقارالىق كورمەلەر ۇيىمداستىرۋ، بالالار باعدارلامالارىن ازىرلەۋ جانە وتكىزۋ، جاڭا اۋديتوريانى تارتۋ جولدارى سىندى ماسەلەلەر قامتىلدى.
– ءماندى ءارى مازمۇندى وقۋ باعدارلاماسى اياسىندا ءبىز رەسەيدىڭ ساياسي تاريحى مەملەكەتتىك مۋزەيىنە، سانكت-پەتەربۋرگتىڭ مەملەكەتتىك تاريح مۇراجايىنا، پەتروپاۆل بەكىنىسىنە، رەسەي ەتنوگرافيالىق مۇراجايىنا، «بالتىق ءۇيى» تەاتر-فەستيۆالىنە، لەنينگرادتىڭ مەملەكەتتىك قورعانىس جانە بلوكادا مەموريالدىق مۇراجايىنا، تاريحي تاربيە بەرۋ بالالار مۇراجاي ورتالىعىنا جانە رەسەي مەملەكەتتىك ونەر مۇراجايىنا باردىق. بۇل بىزگە رۋحانيات الەمىنەن مول ماعلۇمات الۋعا مۇمكىندىك بەردى. جاس ماماندارعا مۇنداي جوبالار وتە قاجەت. ۇيرەنگەنىمىزدى وزىمىزدە قولدانۋعا ءازىرمىز، – دەيدى ونەرتانۋ ماگيسترى، ءابىلحان قاستەيەۆ اتىنداعى ق ر مەملەكەتتىك ونەر مۋزەيىنىڭ باسپا ءسوز حاتشىسى اقبوتا ءالىمحوجينا.
