رۇقسات ەتىلمەگەن قوقىس تاستايتىن ورىندار تۇرعىندار مەن مەملەكەتتىك ورگانداردىڭ 60 %-ىنىڭ نازارىن اۋدارىپ وتىرعان پروبلەماعا اينالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
ەكولوگيا، گەولوگيا جانە تابيعي رەسۋرستار مينيسترلىگى باسپا ءسوز قىزمەتىنىڭ مالىمەتىنشە، جىل باسىنان بەرى 2000-عا جۋىق قوقىس ورىندارى انىقتالعان.
«بۇل تۇيتكىلمەن كۇرەسۋ ءۇشىن ءىىم جانە جەرگىلىكتى اتقارۋشى ورگاندارمەن بىرلەسىپ قوقىس تاستايتىن جەرلەردى جويۋ بويىنشا ءۇشجاقتى ءىس-شارالار جوسپارى بەكىتىلدى. سوعان سايكەس، قازاقستاننىڭ ءبىرقاتار وڭىرىندە قالدىقتاردى زاڭسىز توگۋ ورىندارىن انىقتاۋ بويىنشا رەيدتەر ءوتتى. ماسەلەن، مامىر ايىندا رەسپۋبليكا اۋماعىندا 31 رەيد جاسادىق. مۇندا اتىراۋ، قىزىلوردا، اقمولا، الماتى، باتىس قازاقستان، سولتۇستىك قازاقستان، قوستاناي، قاراعاندى وبلىستارىن، سونداي-اق الماتى، نۇر-سۇلتان جانە شىمكەنت قالالارىن قامتىدىق»، - دەپ جازدى ۆەدومستۆودان.
ناتيجەسىندە 150-گە جۋىق رۇقسات ەتىلمەگەن قوقىس ورىندارى انىقتالعان. 14 دەرەككە قاتىستى (بۇل شامامەن 88 قالدىق نىسانى) اقبتك-نىڭ 344-بابى بويىنشا 153 مىڭ تەڭگە مولشەرىندە ايىپپۇل سالىندى. 20-دان استام قالدىقتار سول جەردە جويىلدى. قوقىس تاستايتىن ورىنداردى انىقتاۋ شارالارى جالعاساتىن بولادى.