الماتىدا جەكە موبيلدىلىك قۇرالدارىنىڭ قاتىسۋىمەن جول اپاتتارى ارتىپ كەلەدى
الماتىدا موپەد، ەلەكتروساموكات، مونودوڭگەلەك سەكىلدى كولىك قۇرالدارىنىڭ قاتىسۋىمەن جول اپاتتارى ارتىپ وتىر. بۇل تۋرالى الماتى قالالىق پوليسيا دەپارتامەنتى اكىمشىلىك پوليسيا باسقارماسىنىڭ باستىعى نۇرلان امانبەك ايتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
«الماتى قالاسىندا جەكە موبيلدىلىك قۇرالدارى، ياعني، موپەد، ەلەكتروساموكات، مونودوڭگەلەك سەكىلدى كولىك قۇرالدارىنىڭ قاتىسۋىمەن جول اپاتتارى ارتىپ كەلەدى. سەبەبى، ولاردىڭ قوزعالىسىن باقىلاپ وتىرعان ەشكىم جوق، بۇل قۇرالداردى باسقارۋشىلارعا ەشقانداي شەكتەۋلەر جوق، ياعني، ولاردىڭ جۇرگىزۋشىلەرى قايدا جۇرگىسى كەلسە جۇرە بەرەدى. وسىعان وراي، الداعى ۋاقىتتا الماتىدا كولىكتىڭ وسى تۇرلەرىنىڭ ءجۇرۋ ءتارتىبى، ولاردىڭ جۇرگىزۋشىلەرىن اكىمشىلىككە جاۋاپقا تارتۋ تۋرالى شارالار قابىلداناتىن بولادى»، - دەدى نۇرلان امانبەك.
ونىڭ ايتۋىنشا، قالادا ادام ولىمىنە اكەلەتىن جول اپاتتارى تۇنگى ۋاقىتتا كوپ بولادى.
«بۇل ۋاقىتتا كولىك كەپتەلىستەرى جوق، كەيبىر جۇرگىزۋشىلەر ماس كۇيىندە كولىك جۇرگىزەدى جانە تۇنگى ۋاقىتتا ادامنىڭ كورۋ قابىلەتى ناشارلايدى. ياعني، جۇرگىزۋشى تۇندە كولىگىمەن مانيەۆر جاساعان كەزدە، جانىنداعى كولىكتى بايقاماي، جول اپاتىن جاسايدى. ال تۇنگى ۋاقىتتا بولاتىن جول اپاتتارىنىڭ نەگىزگى سەبەپ-سالدارى - كولىكتى اسا جوعارى جىلدامدىقپەن جۇرگىزۋ، قاراما قارسى باعىتقا شىعىپ كەتۋ بولىپ تابىلادى. كۇندىزگى ۋاقىتتا دا جول اپاتتارى بولادى. ءبىراق، ول كەزدە ادامداردىڭ زارداپ شەگۋى از»، - دەدى پوليسەي.
سونداي-اق ول الماتىدا بۇگىنگى كۇنى رەسمي تۇردە 550 مىڭنان استام اۆكولىك تىركەلگەنىن، ودان بولەك 300 مىڭعا جۋىق اۆتوكولىك بەينەكامەرالارمەن باقىلاناتىنىن، ياعني، قالادا كۇندەلىكتى 900 مىڭداي اۆتوكولىكتىڭ قوزعالىسى بولاتىنىن اتاپ ءوتتى.