كارانتين شارالارىن ساقتاماعانى ءۇشىن اكىمشىلىك جانە قارجىلىق جاۋاپكەرشىلىك جۇكتەلەدى
اعىمداعى جىل باسىنان بەرى سانيتارلىق-ەپيدەميولوگيالىق باقىلاۋ دەپارتامەنتتەرىنىڭ، اكىمدىكتەردىڭ، قوعام بەلسەندىلەرى مەن پوليسيا قىزمەتتەرىنىڭ وكىلدەرى مەملەكەتتىك ورگاندار ايقىنداعان سانيتارلىق-كارانتيندىك ءىس-شارالاردى ساقتاۋ تۇرعىسىنان شوب وبەكتىلەرىنە مونيتورينگ جۇرگىزۋ بويىنشا تۇراقتى جۇمىس جۇرگىزۋدە، دەپ حابارلايدى Almaty-akshamy.kz.
بۇل تۋرالى سانيتارلىق-ەپيدەميولوگيالىق باقىلاۋ كوميتەتى حاباردار ەتتى.
مونيتورينگ نەگىزىنەن قوعامدىق تاماقتانۋ، ساۋدا نىساندارى، سونىمەن قاتار ادامداردىڭ كوپ شوعىرلانۋىمەن بۇقارالىق ءىس-شارالار وتكىزىلەتىن ورىنداردى قامتيدى.
اعىمداعى جىلعى 1 قاڭتار مەن 25 قىركۇيەك ارالىعىندا ەلىمىزدىڭ بارلىق وڭىرلەرى بويىنشا 180 998 رەيدتىك تەكسەرۋ جۇرگىزىلدى، 975 124 وبەكت قامتىلدى. ونىڭ ىشىندە كارانتين تالاپتارىن بۇزۋشىلىق 26 667 (2،7%) نىساندا انىقتالدى. سونىڭ ىشىندە باسىم بولىگى شقو-دا (5 344)، تۇركىستان (4 399)، قاراعاندى (1 660) وبلىستارىندا، الماتى (3 906)، شىمكەنت (2 452)، نۇر-سۇلتان (1 580) قالالارىندا تىركەلدى.
نەگىزگى بۇزۋشىلىقتار: كارانتين كەزەڭىندە قىزمەتىنە تىيىم سالىنعان وبەكتىلەردىڭ جۇمىس ىستەۋى، قوناققا بارۋ كەزىندە شەكتەۋ رەجيمىنىڭ ساقتالماۋى، كارانتيندىك رەجيم تالاپتارىنا جاۋاپ بەرمەيتىن بۇقارالىق ءىس-شارالار وتكىزۋ.
4 067 جوسپاردان تىس تەكسەرۋ ناتيجەلەرى بويىنشا 3 742 ۇيعارىم بەرىلدى، 392 ماتەريال سوتقا جولداندى، 113 نىساننىڭ قىزمەتى توقتاتىلدى. اكىمشىلىك سانكسيالار 15 086 نىسانعا جانە 9 833 جەكە تۇلعاعا سالىندى، جالپى سوماسى 2 ملرد. تەڭگەدەن استام ايىپپۇل ءوندىرىلدى.