قۇس وسىرۋشىلەر اۋىل شارۋاشىلىعى مينيسترلىگى ءوزىنىڭ ۋادەسىن ورىنداماعانىن ايتادى.
ەلىمىزدە جۇمىرتقا قىمباتتاۋى مۇمكىن. جارتى جىل بويى سالا شىعىنعا باتىپ جۇمىس ىستەگەن. ماماندار مەملەكەتتىڭ قولداۋىن كۇتەمىز دەپ جۇمىرتقانىڭ باعاسىن ۇستاپ تۇرعانىن ايتادى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
ەلىمىزدەگى قۇس شارۋاشىلىعىندا ەڭبەك ەتەتىندەردىڭ 70 پايىزى اۋىل، اۋدانداعى ايەلدەر بولىپ وتىر. قۇس فابريكالارىندا 12 مىڭ قىزمەتكەر جۇمىس ىستەيدى.
ءبىر جىلدا ەل تۇرعىندارى 5 ملرد دانا جۇمىرتقا تۇتىنادى. ىشكى نارىقتى تەك وتاندىق فەرمەرلەر قامتاماسىز ەتىپ وتىر.
قاراعاندىداعى قۇس فابريكاسىنىڭ ءوندىرىس باسشىسى دوس ماحانوۆ فابريكا تاۋلىگىنە 310 مىڭ دانا جۇمىرتقا شىعاراتىنىن ايتادى.
«ءبىراق جاعداي وسىلاي جالعاسا بەرەتىن بولسا، ءبىز ءوندىرىستى قىسقارتۋعا ءماجبۇر بولامىز. ايلىقتىڭ ازدىعىنان قىزمەتكەرلەر باسقا سالاعا اۋىسىپ جاتىر. قۇس فابريكاسى استانا، قاراعاندى جانە تۇركىستان وبلىستارىن جۇمىرتقامەن قامتاماسىز ەتىپ وتىر. بۇل سالانى قامتيتىن قوندىرعىلارعا دا قىرۋار قارجى كەرەك»، - دەيدى ول.
قۇس وسىرۋشىلەر سوڭعى جىلدارى سالادا داعدارىس بولىپ جاتقانىن ايتادى.
«جىل سايىن بولىنەتىن سۋبسيديا كولەمى قىسقارا بەردى. بيىل مۇلدەم توقتاپ قالدى. ءقازىر 24 پايىزدىق نەسيەمەن قالدىق. سۋبسيديانى الىپ تاستاۋ قۇس ءوسىرۋ سالاسىنا تۇبەگەيلى اسەر ەتىپ وتىر. 12 مىڭ قىزمەتكەر جۇمىسسىز قالسا، قايدا بارادى؟»، - دەيدى ولار.
قۇس ءوسىرۋ سالاسىنىڭ قىزمەتكەرلەرى اشم باسشىسى ەربول قاراشوكەيەۆتىڭ 2022 جىلى 12 جەلتوقساندا ماجىلىستەگى دوڭگەلەك ۇستەلدە ايتقان ۋادەسىنە سەنگەن.
«قاڭتاردا بۇل ماسەلەنى شەشەمىز. قاراجات بار. ورتالىقتاندىرىلعان ترانسفەرت ارقىلى بەرىلەتىن سۋبسيديا كولەمى بەلگىلەنگەن»، - دەگەن ەدى ول.
سونىمەن قاتار، قۇس وسىرۋشىلەر اۋىل شارۋاشىلىعى مينيسترلىگىنە بىرنەشە رەت حات جولداعان. ءبىراق، سۋبسيديانىڭ اۋىلى ءالى دە الىس.