ال استانا، الماتى جانە شىمكەنت قالالارىندا بۇل كورسەتكىش ودان دا جوعارى – 86%.
ول ءۇشىن ەل بويىنشا 18 مىڭنان استام ستاسيونارلىق كامەرا قولدانىلادى، دەپ حابارلايدى Almaty-akshamy.kz
ءىىم پوليسيا قىزمەتىن تولىعىمەن سيفرلاندىرماق. كۇندەلىكتى پوليسيا قىزمەتىندە زاماناۋي تەحنولوگيالاردى كەڭىنەن قولدانۋ - مەملەكەت باسشىسىنىڭ ىشكى ىستەر ورگاندارىنىڭ الدىنا قويعان باستى مىندەتتەرىنىڭ ءبىرى.
بۇل قۇقىق بۇزۋشىلىقتاردىڭ الدىن الۋعا جانە قىلمىستاردى جەدەل اشۋعا مۇمكىندىك بەرەدى.
قالا سىرتىنداعى جولداردى باقىلاۋدى پاترۋلدىك اۆتوكولىكتەردە ورناتىلعان اۆتوماتتى باعدارلامالىق كەشەندەر جۇرگىزەدى. بۇگىنگى تاڭدا بۇكىل قازاقستان بويىنشا وسىنداي 60 جىلجىمالى قۇرىلعى جۇمىس ىستەيدى. جول ءجۇرىسى قاعيدالارىن "قاساقانا بۇزۋشىلاردى" جانە "ءقاۋىپتى جۇرگىزۋشىلەردى" انىقتاۋ ءۇشىن ءىىم وتكەن جىلى "قورعاۋ" باعدارلاماسىن ىسكە قوستى. ونىڭ كومەگىمەن جالعان ءنومىرلى، ساقتاندىرۋى جوق، ىزدەۋدە جۇرگەن اۆتوكولىكتەردى، سونداي-اق جۇرگىزۋ قۇقىعىنان ايىرىلعان، جول قوزعالىسى ەرەجەلەرىن جۇيەلى تۇردە بۇزاتىن جانە ايىپپۇل تولەمەيتىن جۇرگىزۋشىلەردى انىقتاۋعا بولادى. قۇقىق بۇزۋشى تۋرالى بارلىق اقپارات كامەرالاردان جەدەل باسقارۋ ورتالىعىنىڭ وپەراتورىنا جانە جاقىن ماڭداعى پاترۋلدىك پوليسيا قىزمەتكەرىنىڭ پلانشەتىنە جىبەرىلەدى. ياعني، بۇرىنعىداي بارلىق كولىكتەردى قاتارىنان توقتاتۋدىڭ قاجەتى جوق، ويتكەنى جۇيەنىڭ ءوزى پوليسياعا جۇرگىزۋشىلەردىڭ قايسىسى جولدا "ءقاۋىپتى" ەكەنىن كورسەتەدى.
سيفرلىق تەحنولوگيالاردىڭ ارقاسىندا پوليسەيلەر قوعامدىق قاۋىپسىزدىكتى قورعاۋعا كوبىرەك قاتىسادى جانە قۇقىق بۇزۋشىلىقتارعا قارسى ساقتىق شارالارىن قابىلدايدى.
ءتارتىپ ساقشىلارىنىڭ وزدەرىن تەحنيكالىق تۇرعىدان جاراقتاندىرۋ دا بەلسەندى جۇرگىزىلۋدە. بۇگىنگى تاڭدا ءاربىر پاترۋلدىك قىزمەتكەر جەكە بەينەجەتونمەن جابدىقتالعان. ال استانا، الماتى جانە پەتروپاۆلدا بەينەجەتوندار ارنايى زاماناۋي ءموبيلدى بەينەكەشەندەرگە اۋىستىرىلدى. مۇنداي "سمارتجەتونداردى" پايدالانۋ: بەينەنى نەمەسە دىبىستى ءوز بەتىنشە ءوشىرۋدى بولدىرماۋعا؛ ونلاين رەجيمىندە جاعدايدى كورۋ ءۇشىن قاشىقتان قوسىلۋدى جۇزەگە اسىرۋعا؛ جبو وفيسەرلەرى مەن باسشىعا قىزمەتكەردىڭ ناقتى ورنالاسقان جەرىن جانە ءپاترۋلدىڭ مارشرۋتتان اۋىتقىپ كەتپەۋىن قاداعالاۋعا مۇمكىندىك بەرەدى.
سيفرلىق تەحنولوگيالار پوليسيا قىزمەتكەرلەرىنىڭ جۇمىس تيىمدىلىگىن ارتتىرىپ، سىبايلاس جەمقورلىق تاۋەكەلدەرىن ازايتادى. مىسالى، 3 اقپاندا قاراعاندى وبلىسى پوليسيا دەپارتامەنتىنىڭ وزىندىك قاۋىپسىزدىك قىزمەتكەرلەرى پاترۋلدىك پوليسەيگە پارا بەرۋ فاكتىسى بويىنشا ءىس قوزعادى. جول قوزعالىسى ەرەجەلەرىن بۇزعان جۇرگىزۋشى حاتتاما تولتىرماۋ ءۇشىن قىزمەتكەرگە پارا بەرگىسى كەلگەن. 5 اقپاندا اتالمىش وبلىستىڭ شەت اۋدانىندا وسىنداي فاكت توقتاتىلدى. قارسى جولاققا شىققان جۇرگىزۋشى پاترۋل قىزمەتكەرىنە اقشا ۇسىنعان. ءىس بويىنشا تەرگەۋ جۇرگىزىلۋدە.
ءىىم سيفرلىق شەشىمدەردى پايدالانۋ ازاماتتاردىڭ قاۋىپسىزدىگىن قامتاماسىز ەتۋ بويىنشا پوليسيا جۇمىسىنىڭ تيىمدىلىگىن ارتتىرىپ قانا قويماي، سونىمەن بىرگە جالپى ىشكى ىستەر ورگاندارىنىڭ قىزمەتىندەگى سىبايلاس جەمقورلىق تاۋەكەلدەرىن ايتارلىقتاي تومەندەتەدى دەپ سانايدى.