ەلىمىزدە تراسسالارداعى جول بەلگىلەرى ءجيى ۇرلانادى.
كوبىنە قاۋىپسىزدىك ءۇشىن قويىلعان قورشاۋلار، جارىققا شاعىلىساتىن جانە ەسكەرتۋ بەلگىلەرى قولدى بولادى، دەپ حابارلايدى Almaty-akshamy.kz.
وسىلايشا، وتكەن جىلى رەسپۋبليكا بويىنشا 60 ملن تەڭگەدەن استام شىعىن كەلىپتى. كۇرە جولدىڭ بويىنداعى قاۋىپسىزدىك قورشاۋلارى مەن ەسكەرتپە بەلگىلەرگە دەگەن سۇرانىس ارتىپ تۇر. كوبىنە ەلدى مەكەندەردىڭ ماڭايىنداعىلارى ۇرلانادى. مال قوراسىن بىتەپ، قۇرىلىسقا قولدانىپ، ايتەۋىر ءبىر كادەگە جاراتاتىن كورىنەدى. جولعا جاۋاپتى مەكەمەنىڭ مالىمەتىنشە، بىلتىر 60 ملن تەڭگەدەن اسا زيان كەلگەن. پىسىقايلاردىڭ بۇل ارەكەتى جولاۋشىلاردىڭ ومىرىنە ءقاۋىپ ءتوندىرىپ وتىر.
"جول بەلگىلەرىنىڭ ۇرلانۋى جولداعى قاۋىپسىزدىكتىڭ تومەندەۋىنە الىپ كەلەدى. قاراپايىم جانۋارلاردان قورعايتىن قورشاۋلاردى ءجيى الىپ كەتىپ جاتادى. وتكەن جىلدىڭ وزىندە جانۋارلاردىڭ قاتىسۋىمەن 109 جول-كولىك وقيعاسى بولدى. سول 109 كولىك وقيعاسىندا 135-تەن اسا ادام ءارتۇرلى دەڭگەيدە جاراقات العان. قاتەلەسپەسەم، 30-دان اسا ادام قازا تاپقان"، - دەيدى «قازاۆتوجول» باسپا ءسوز قىزمەتىنىڭ باسشىسى ادينا اينايەۆا.
بيىل ۇرلانعان نەمەسە توزىعى جەتكەندەرىنىڭ ورنىنا 10 مىڭ جاڭا جول بەلگىسى ورناتىلادى. ەلىمىزدە 25 مىڭ شاقىرىم جول تورابى بار ەكەن. سونىڭ 473 مىڭنان اسا شارشى مەترى ويىلىپ، 90 مىڭ شارشى مەترى تولقىندانىپ كەتكەن.
جولدىڭ جىلدام توزۋىنا قۇرىلىس ساپاسى مەن اۋىر جۇك كولىكتەرى اسەر ەتەدى.
"قازىرگى تاڭدا جۇك كولىكتەرى 70 تونناعا دەيىن الىپ جۇرەدى. ءبىزدىڭ جولدار وندايعا ەسەپتەلمەگەن، ءبىر وسقا 8 توننا. مىسالى، كامازدى الاتىن بولساق، 3 وس بار، 24 توننا الىپ جۇرۋىنە بولادى. ول 24 توننا – ۇستىندەگى جۇگى ەمەس، ماشينامەن بىرگە ەسەپتەگەندەگى جالپى سالماعى. كامازدىڭ ءوزى 14 توننا بولسا، ونىڭ ۇستىنەن 10 توننا الىپ جۇرە الادى"، - «قازاۆتوجول» الماتى وبلىسى بويىنشا باس ينجەنەرى بەرىك سارقىتبايەۆ.
جۇك كولىكتەرىنە قاتىستى ۋاقىت جاعىنان دا شەكتەۋلەر بار. كوكتەم مەن كۇزدەگى ىلعالدى اۋا رايىندا جانە جازدىڭ شىلىڭگىر ىستىعىندا تاڭعى ساعات 10:00-دەن باستاپ، تۇنگى ساعات 22:00-گە دەيىن شەكتەۋ قويىلادى. ءبىراق بارلىق جۇرگىزۋشى بۇل ەرەجەنى ساقتاي بەرمەيدى.