15 اسكەري قىزمەتشى قاتىسىپ جاتىر.
قورعانىس مينيسترلىگىنىڭ بىتىمگەرشىلىك دايىندىق ورتالىعىندا «بۇۇ شتابتىق وفيسەرلەرى» حالىقارالىق كۋرسى اياسىندا وفيسەرلەردى وقىتۋ ۇيىمداستىرىلىپ وتىر، دەپ حابارلايدى Almaty-akshamy.kz.
«اتالعان دايارلىق كۋرسىنا قازاقستان، ۇلىبريتانيا، موزامبيك جانە پاكىستاننان كەلگەن 15 اسكەري قىزمەتشى قاتىسىپ جاتىر. بايانداماشىلار رەتىندە حالىقارالىق قىزىل كرەست كوميتەتى ايماقتىق وكىلدىگىنىڭ وكىلدەرى، سونداي-اق بۇۇ-نىڭ كيپردەگى ميسسياسىنىڭ بريتاندىق ساراپشىسى شاقىرىلعان»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
ەكى اپتا بويى وفيسەرلەر بىرىككەن ۇلتتار ۇيىمىنىڭ قامقورلىعىمەن بىتىمگەرلىك وپەراسيالاردا كوپۇلتتى شتابتار قۇرامىندا جۇمىس ىستەۋ نەگىزدەرىن ۇيرەنەدى. «بۇۇ شتابتىق وفيسەرلەرى» كۋرسى اعىلشىن تىلىندە وتكىزىلەدى جانە بۇل كۋرس 2018 جىلى ءتيىستى حالىقارالىق سەرتيفيكاتتاۋدان وتكەن.
تىڭداۋشىلار ساباق بارىسىندا بىرىككەن ۇلتتار ۇيىمىنىڭ قۇرىلىمىمەن، ەرەجەلەرىمەن، راسىمدەرىمەن، سونداي-اق بىتىمگەرشىلىك قىزمەتتى رەتتەيتىن قۇقىقتىق نورمالارمەن تانىسادى. باعدارلامادا جوسپارلاۋ جانە شەشىم قابىلداۋ ۇدەرىستەرىن، بۇۇ ميسسيالارىنداعى حالىقارالىق شتابتار بولىمدەرى مەن قىزمەتتەرىنىڭ نەگىزگى فۋنكسيالارىن زەردەلەۋ دە كوزدەلگەن.