بۇل تۋرالى پرەزيدەنتتىڭ كەڭەسشىسى قۋانىشبەك ەسەكەيەۆ ايتتى.
قازاقستاندا جاساندى ينتەللەكت ۇلتتىق ورتالىعى اشىلاتىن بولدى، دەپ حابارلايدى Almaty-akshamy.kz
"دوستار، جاقىندا ءبىز سيفرلىق دامۋ، يننوۆاسيالار جانە اەروعارىش ونەركاسىبى جانە Astana Hub ارىپتەستەرىمەن بىرگە قازاقستان رەسپۋبليكاسىندا جاساندى ينتەللەكتتى دامىتۋ تۇجىرىمداماسى شەڭبەرىندە دەرەكتەردى وڭدەۋ ورتالىعى مەن سۋپەركومپيۋتەر سالۋ جوباسى بويىنشا جۇمىس توبىنىڭ وتىرىسىن وتكىزدىك. بۇل پلاتفورمانىڭ ماقساتى – قازاقستان ەكونوميكاسىن دامىتۋ ءۇشىن تەحنولوگيالاردى ءتيىمدى ەنگىزۋ جانە AI الەۋەتىن بارىنشا تولىق پايدالانۋ. وسى تۇجىرىمدامانىڭ اياسىندا AI ۇلتتىق ورتالىعىن اشۋ جوسپارلانۋدا"، دەپ جازدى قۋانىشبەك ەسەكەيەۆ Facebook-تەگى پاراقشاسىندا.
جوبانىڭ ميسسياسى - الداعى جىلداردا قازاقستاننىڭ AI ترانسفورماسياسىن جۇزەگە اسىرۋ.
"AIء-دىڭ ۇلتتىق ەكونوميكا مەن قوعامعا ينتەگراسياسى - تۇراقتى دامۋدى ساقتاۋدىڭ جانە بولاشاقتىڭ سىن-قاتەرلەرىنە دايىندالۋدىڭ قاجەتتى شارتى بولىپ تابىلادى. مەملەكەتتىڭ AI ۇلتتىق ورتالىعىن اشۋ جونىندەگى جوسپارلارى - ءبىلىم بەرۋ، ينفراقۇرىلىمدى دامىتۋ، ۆەنچۋرلىق ينۆەستيسيالار، سونداي-اق IT شەشىمدەرىنىڭ ەكسپورتىن قولداۋ سالاسىنداعى ءبىرقاتار نەگىزگى باستامالارىن قامتيدى"، دەدى ول جازباسىندا.
سونداي-اق وسى جوبا اياسىندا كەلەسى باستامالاردى قامتيتىن جول كارتاسى ازىرلەندى:
AI سالاسىنداعى نەگىزگى جوبالار مەن زەرتتەۋلەردە ىنتىماقتاسۋ ءۇشىن ءبىلىم بەرۋ مەكەمەلەرىن، زەرتتەۋ زەرتحانالارىن، ستارتاپتار مەن تەحنولوگيالىق مەكەمەلەردى بىرىكتىرەتىن AI كامپۋسى؛
YNOV، 01EduSystem جانە Tumo مەكتەپتەرىنىڭ وزىق تاجىريبەسىن ەسكەرە وتىرىپ ازىرلەنەتىن وقۋ باعدارلامالارىن قولدانىپ، وقۋشىلار مەن ستۋدەنتتەر اراسىندا AI ماماندارىن دايارلاۋ؛
وقۋ كۋرستارى، شەبەرلىك ساباقتارى جانە جەلىلىك ءىس-شارالار ارقىلى AI قاۋىمداستىعىن دامىتۋعا ۇلەس قوساتىن P2P اكادەمياسىن اشۋ.
"بۇل باستامالار ەلىمىزدە يننوۆاسيالىق دامۋعا، ءبىلىم مەن وقىتۋ دەڭگەيىن ارتتىرۋعا، سونداي-اق جاھاندىق AI يندۋسترياسىنداعى ەلىمىزدىڭ پوزيسياسىن نىعايتۋعا ىقپال ەتەتىن تۇراقتى AI ەكوجۇيەسىن قۇرۋعا باعىتتالعان"، دەلىنگەن جازبادا.