جىل سايىن دۇنيە جۇزىندە، ونىڭ ىشىندە قازاقستاندا 1 قازان حالىقارالىق قارتتار كۇنى رەتىندە اتالىپ وتەدى.
رەسپۋبليكادا جاسى بويىنشا 2،4 ميلليوننان استام زەينەتكەر تۇرادى، دەپ حابارلايدى aqshamnews.kz.
ءاربىر ازاماتتىڭ لايىقتى قارتايۋىن قامتاماسىز ەتۋ – ۇكىمەتتىڭ الەۋمەتتىك ساياساتىنىڭ باستى مىندەتتەرىنىڭ ءبىرى.
مەملەكەت اعا بۋىن وكىلدەرىن الەۋمەتتىك قورعاۋ، ونىڭ ىشىندە زەينەتاقىمەن قامسىزداندىرۋ جۇيەسىن جەتىلدىرۋگە باعىتتالعان شارالاردى دايەكتى تۇردە قابىلداۋدا.
قازاقستان رەسپۋبليكاسىنىڭ زەينەتاقى جۇيەسىن ودان ءارى جاڭعىرتۋدىڭ 2030 جىلعا دەيىنگى تۇجىرىمداماسىنا سايكەس بازالىق زەينەتاقى مولشەرى جىل سايىن ينفلياسيا دەڭگەيىنە، ال ىنتىماقتى زەينەتاقى مولشەرى ينفلياسيا دەڭگەيىنەن 2%-عا ىلگەرى يندەكستەلەدى.
ماسەلەن، 2024 جىلعى 1 قاڭتاردان باستاپ ىنتىماقتى زەينەتاقىلاردىڭ مولشەرى 9%-عا ۇلعايتىلدى جانە ەڭ تومەنگى كۇنكورىس دەڭگەيى كولەمىنىڭ وزگەرۋىنە بايلانىستى بازالىق زەينەتاقىنىڭ مولشەرى ارتتىرىلدى.
مەملەكەت باسشىسىنىڭ تاپسىرماسىنا سايكەس بازالىق زەينەتاقىنىڭ مولشەرىن كەزەڭ-كەزەڭىمەن ارتتىرۋ جالعاسۋدا. وسىلايشا، 2024 جىلعى 1 قاڭتاردان باستاپ ونىڭ ەڭ تومەنگى مولشەرى ەڭ تومەن كۇنكورىس دەڭگەيىنىڭ 60%-ىنان 65%-ىنا دەيىن، ال ەڭ جوعارى مولشەرى 100%-ىنان 105%-ىنا دەيىن ارتتىرىلدى.
سونىمەن قاتار قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى قارت ادامداردى قولداۋ، ولارعا الەۋمەتتىك قىزمەت كورسەتۋ دەڭگەيىن ارتتىرۋ، قوعامدىق ومىرگە تارتۋ بويىنشا شارالاردى ىسكە اسىرۋدا.
رەسپۋبليكادا 92 بەلسەندى ۇزاق ءومىر ءسۇرۋ ورتالىعى اشىلىپ، جۇمىس ىستەۋدە. ورتالىقتاردىڭ جۇمىسىنا ىستەۋىنە جەرگىلىكتى بيۋدجەتتەردەن بولىنگەن قاراجاتتىڭ جالپى سوماسى 2024 جىلعا 5،9 ملرد تەڭگەنى قۇرادى.
بەلسەندى ۇزاق ءومىر ءسۇرۋ ورتالىقتارى «ءبىر تەرەزە» قاعيداتى بويىنشا ءۇش باعىتتا جۇمىس ىستەيدى: بەلسەندى ۇزاق ءومىر ءسۇرۋ، دەنساۋلىق مادەنيەتى جانە قوعاممەن بايلانىس. ورتالىقتاردىڭ قىزمەتى ەگدە جاستاعى ادامداردىڭ ءومىر ءسۇرۋ ساپاسىن جاقسارتۋعا، ءونىمدى جانە بەلسەندى ۇزاق ءومىر ءسۇرۋدى ىنتالاندىرۋعا، ونىڭ ىشىندە جۇيەلى بوس ۋاقىتتى ۇيىمداستىرۋعا (يوگا، سكانديناۆيالىق ءجۇرىس، سيفرلىق ساۋاتتىلىقتى ارتتىرۋ، موتيۆاسيالىق جانە كاسىپكەرلىك كۋرستار، اعىلشىن ءتىلى كۋرستارى جانە ت.ب.)، قارتتاردىڭ ەركىندىگىن قامتاماسىز ەتۋگە، قوعام ومىرىنە قاتىسۋعا باعىتتالعان.
1 قازاندا ەلىمىزدە قارتتار كۇنىنە ورايلاستىرىلعان ايلىق باستالادى. وبلىستاردىڭ، قالالار مەن اۋدانداردىڭ اكىمدەرى، كاسىپورىندار مەن ۇيىمداردىڭ باسشىلارى اعا بۋىن ازاماتتارىن الەۋمەتتىك قولداۋ جونىندەگى ءىس-شارالاردى، ەڭبەك ۇجىمدارىندا كەزدەسۋلەردى، امبۋلاتوريالىق-ەمحانالىق ۇيىمداردا اشىق ەسىك كۇندەرىن جانە باسقالاردى وتكىزەتىن بولادى.
سونىمەن قاتار قارتتار كۇنىنە وراي استانا قالاسىندا، اقمولا (ەڭ تومەنگى زەينەتاقى الۋشىلارعا)، قاراعاندى (75 جاستان اسقان ازاماتتارعا)، پاۆلودار (ەڭ تومەنگى زەينەتاقى الۋشىلارعا جانە 80 جاستان اسقان ازاماتتارعا)، شىعىس قازاقستان (90 جاستان اسقان ازاماتتارعا)، ماڭعىستاۋ (70 جاستان اسقان ازاماتتارعا 25 قازانعا قارسى)، تۇركىستان (جالعىزباستى زەينەتكەرلەرگە جانە 100 جاستان اسقان ازاماتتارعا) وبلىستارىندا، سونداي-اق ۇلىتاۋ وبلىسىندا (70 جاستان اسقان ازاماتتارعا جانە مۇگەدەكتىگى بار ادامدارعا) 235،8 مىڭ ادامدى قامتي وتىرىپ، جالپى سوماسى 2،7 ملرد تەڭگەگە ءبىرجولعى ماتەريالدىق كومەك كورسەتىلەتىن بولادى.
جالپى، بيىل جەرگىلىكتى بيۋدجەتتەردىڭ مۇمكىندىكتەرىن ەسكەرە وتىرىپ جانە بيزنەستىڭ الەۋمەتتىك جاۋاپكەرشىلىگى اياسىندا قارت ازاماتتاردى الەۋمەتتىك قولداۋعا 12،4 ملرد تەڭگەدەن استام قاراجات باعىتتالدى (ونىڭ ىشىندە جەرگىلىكتى بيۋدجەتتەردەن – 11،8 ملرد تەڭگە، تارتىلعان قاراجات ەسەبىنەن – 0،6 ملرد تەڭگە)، ونىڭ ىشىندە:
- ازىق-تۇلىك جيىنتىعىن ۇسىنۋعا – 229،4 ملن تەڭگە (26،5 مىڭ ادام)؛
- جەڭىلدىكپەن دارى-دارمەكپەن قامتاماسىز ەتۋگە – 2 ملرد 318 ملن تەڭگە (62،2 مىڭ ادام)؛
- ءتىس پروتەزدەۋگە – 515،5 ملن تەڭگە (3،9 مىڭ ادام)؛
- ساناتورييلىك-كۋرورتتىق ەمدەۋدى ۇسىنۋعا – 3 ملرد 448 ملن تەڭگە (23،3 مىڭ ادام)؛
- تۇرعىن ءۇيدى جوندەۋگە – 31،4 ملن تەڭگە (189 ادام)؛
- وتىنمەن قامتاماسىز ەتۋگە – 75،6 ملن تەڭگە (2،6 مىڭ ادام)؛
- جالپى پايدالانۋداعى كولىكتە جەڭىلدىكپەن جول ءجۇرۋدى ۇسىنۋعا – 5 ملرد 179 ملن تەڭگە (409،9 مىڭ ادام)؛
- كومەكتىڭ باسقا تۇرلەرىنە – 638،4 ملن تەڭگە (81،5 مىڭ ادام).
حالىقارالىق قارتتار كۇنى 1990 جىلى 14 جەلتوقساندا بىرىككەن ۇلتتار ۇيىمى باس اسسامبلەياسىنىڭ 45-سەسسياسىندا جاريالانعانىن ەستەرىڭىزگە سالا كەتەيىك.
ونى وتكىزۋدىڭ باستى ماقساتى – قاريالاردىڭ مەملەكەت پەن قوعام الدىنداعى ەڭبەگىن قۇرمەتتەۋ جانە مويىنداۋ، سونداي-اق ولاردىڭ پروبلەمالارى مەن قاجەتتىلىكتەرىنە نازار اۋدارۋ، ءومىر ءسۇرۋ ساپاسىن ارتتىرۋ قاجەتتىلىگى، ولارعا جالپىعا بىردەي قامقورلىق كورسەتۋ.