ۇكىمەتتىڭ باعالاردى بەلگىلەۋ تۋرالى بۇيرىقتارى كۇشىنە ەندى.
قازاقستاندا بولشەك ساۋدادا ساتىلاتىن مۇناي ونىمدەرىنىڭ ءتىزىمى مەن شەكتى باعالارى بەكىتىلدى، دەپ حابارلايدى Almaty-akshamy.kz.
2022 جىلعى 14 شىلدەدە ق ر ەنەرگەتيكا مينيسترلىگىنىڭ مۇناي ونىمدەرىنىڭ تىزبەسىن بەكىتۋ، سونداي-اق مۇناي ونىمدەرىن بولشەك ساۋدادا وتكىزۋگە شەكتى باعالاردى بەلگىلەۋ تۋرالى بۇيرىقتارى كۇشىنە ەندى.
«قوستاناي جانە سولتۇستىك قازاقستان وبلىستارىندا اي-92 جانە اي-93 ماركالى بەنزيننىڭ شەكتى باعاسى ليترىنە 187 تەڭگەن، قازاقستاننىڭ باسقا وبلىستارىندا باعا بۇرىنعى دەڭگەيدە - ليترىنە 182 تەڭگەنى قۇرايدى»، - دەلىنگەن ق ر ەنەرگەتيكا مينيسترلىگىنىڭ باسپا ءسوز قىزمەتى تاراتقان حابارلاماسىندا.
ۆەدومستۆونىڭ اقپاراتى بويىنشا، ەكى وبلىستا باعانى تۇزەتۋ بولشەك ساۋدا ساتۋشىلارىنىڭ مۇناي ونىمدەرىن ءوندىرۋشى زاۋىتتاردان الىستىعىنا بايلانىستى لوگيستيكالىق شىعىندارمەن بايلانىستى.
سونداي-اق مۇناي ونىمدەرى تىزبەسىنەن اي-95 ماركالى بەنزيننىڭ باعاسىن مەملەكەتتىك رەتتەۋ الىنىپ تاستالدى. ويتكەنى اي-95+ جانە ودان جوعارى ءوندىرۋ كەزىندە قىمبات تۇراتىن يمپورتتىق قوسپالار مەن بەنزيندەردىڭ جوعارى وكتاندى كومپونەنتتەرىنىڭ ۇلكەن شىعىنى تالاپ ەتىلەدى. يمپورتتىق قوسپالاردىڭ باعاسى مۇناي باعاسىمەن جانە ۆاليۋتا باعامىمەن بايلانىستى.
بۇيرىققا سايكەس ديزەل وتىنىنا شەكتى باعالار وزگەرمەيدى جانە قازاقستاننىڭ بارلىق وڭىرلەرىندە بۇرىنعى دەڭگەيدە قالادى: اقمولا، اقتوبە، شىعىس قازاقستان، باتىس قازاقستان، قوستاناي، سولتۇستىك قازاقستان وبلىستارىندا، سونداي-اق اباي وبلىسىندا باعا ليترىنە 260 تەڭگەنى قۇرايدى، ال نۇر-سۇلتان، الماتى، شىمكەنت قالالارىندا، الماتى، اتىراۋ، جامبىل، قاراعاندى، قىزىلوردا، پاۆلودار، تۇركىستان، ماڭعىستاۋ وبلىستارىندا، سونداي-اق جەتىسۋ، ۇلىتاۋ وبلىستارىندا - ليترىنە 230 تەڭگە.
بۇيرىق جوبالارى «اشىق نقا» سايتىندا 8 شىلدەگە دەيىن ونلاين-تالقىلاۋ ءۇشىن جاريالاندى.