تۇركىستان وبلىسىنان كەلگەن 200-گە جۋىق جاس كوشباسشى الماتىدا باس قوستى.
ولار ءبىر جىل بويى Jas Leader Akademiiasy پيلوتتىق جوباسى بويىنشا ءوز مەكتەپتەرىندە ءبىلىم الىپ، كوشباسشىلىقتىڭ قىر سىرىن مەڭگەرگەن بولاتىن.
ۇزدىك شىققاندار 5 كۇن بويى فورۋمدا شەبەرلىكتەرىن شىڭدايدى. پيلوتتىق جوباعا تۇركىستان وبلىسىنىڭ تاڭداپ الىنۋى بەكەر ەمەس. ايماق رەسپۋبليكاداعى مەكتەپ وقۋشىلارىنىڭ سانى بويىنشا الدىڭعى قاتاردا. وندا جارتى ميلليوننان استام بالا تۇرادى، دەپ حابارلايدى Almaty-akshamy.kz 24.kz-كە سىلتەمە جاساپ.
جوبا اياسىندا 5-11 سىنىپ ارالىعىنداعى 12 000 مەكتەپ وقۋشىسى ءبىر جىل بويى قاتىناس داعدىلارى، كوپشىلىك الدىندا سويلەۋ، ۋاقىتتى باسقارۋ، توپپەن جۇمىس جاساۋ، جانجالداردى شەشۋ بويىنشا فاكۋلتاتيۆتىك دايىندىقتان ءوتتى.
«ءبىز ترەنەر بولىپ وقۋشىلاردى كوشباسشىلىققا دايىندادىق، بۇل وتە ءبىزدى شابىتتاندىردى. كوپ جۇمىس جاسادىق، بىرلەسە جۇمىس جاسادىق. وقۋشىلارىمىزدىڭ ءبارى قۋانىشتى بۇل جوباعا قاتىسقانىنا. مىنە، ناتيجەسىن كورسەتۋ ءۇشىن الماتى قالاسىنا وقۋشىلاردى عىلىمي جوبالارمەن ۇزدىك كوشباسشىلارىمىزدى قوسا الىپ كەلىپ وتىرمىز»، - دەدى اتاتۇرىك اتىنداعى №17 مەكتەپ-گيمنازيانىڭ ۇستازى (تۇركىستان قالاسى) رانو سۋپابەكوۆا.
الماتىداعى فورۋمعا ترەنينگ قورىتىندىسى بويىنشا ىرىكتەلىپ الىنعان ۇزدىك مەكتەپ وقۋشىلارى مەن ۇستازدار كەلگەن. ولار ءتۇرلى شەبەرلىك ساباقتارىنا قاتىسىپ، دامۋ ساتىلارىن ەڭسەرەدى. سونداي-اق ءارتۇرلى سالانىڭ كوشباسشىلارى بالالارمەن كەزدەسىپ، «جەتىستىك قۇپيالارىمەن» بولىسەدى.
«ءبىز فورۋمدا بالانىڭ ءبىلىمىن، كەيبىر داعدىلارىن كەڭەيتەتىن ترەنينگتەر وتكىزەمىز. توپتىق قارىم-قاتىناس ونەرى، سونداي-اق مەديا ساۋاتتىلىق، قارجىلىق ساۋاتتىلىق، تانىستىرۋ ونەرى سياقتى كوپتەگەن ساباقتار بار»، - دەدى Jas leader akademiiasy جوبالىق توبىنىڭ جەتەكشىسى ناتاليا باحمۋتوۆا.
بيىل كۇزدە Jas Leader Akademiiasy جوباسى جامبىل جانە قىزىلوردا وبلىستارىنداعى 50 مەكتەپتە باستالادى. الداعى ءۇش جىلدا باتىس قازاقستان، اتىراۋ، اقتوبە، جەتىسۋ جانە الماتى وبلىستارىنداعى مەكتەپتەردى قامتۋ جوسپارلانۋدا.