ازيا جاستارى كەڭەسىنىڭ وتىرىسى ءوتتى

ازيا جاستارىنىڭ كەڭەسى - قازاقستان جاستارى ءۇشىن پايدالى ءارى ءتيىمدى الاڭ.

ازياداعى ءوزارا ءىس-قيمىل جانە سەنىم شارالارى كەڭەسى جاستار كەڭەسىنىڭ 5ء-شى وتىرىسىندا قۇرىلىم حاتشىلىعىنىڭ اتقارۋشى ديرەكتورى قايرات سارىباي وسىلاي دەدى. ەلوردا تورىندەگى القالى جيىنعا كاتار، يوردانيا، يزرايل، پالەستينا، وزبەكستان، رەسەي، تايلاند سەكىلدى 15-كە جۋىق مەملەكەتتىڭ وكىلدەرى قاتىستى، دەپ حابارلايدى Almaty-akshamy.kz.

باسقوسۋدا ازيا قۇرلىعىنداعى ستۋدەنتتەر الماسۋ، جۇمىسپەن قامتۋ، جاستاردى تەرىس ءدىني اعىمداردان قورعاۋ، سۋيسيد، ەسىرتكىگە تاۋەلدىلىكتىڭ الدىن الۋ سىندى وزەكتى ماسەلەلەر قارالدى.

«جاستار ءوزىنىڭ ساياساتىن مادەني تۇردە، پارلامەنت جولىمەن، ساياسات جولىمەن قالاي جۇرگىزە الادى.؟ قالاي ونى العا تارتا الادى؟ وسى ماسەلەلەر بويىنشا تۇرىكپا جاستار قاناتىنىڭ وكىلدەرى تۇرىك حالىقتارىنىڭ تاجىريبەسىمەن بولىسەدى»، - دەدى ازياداعى ءوزارا ءىس-قيمىل جانە سەنىم شارالارى كەڭەسى حاتشىلىعىنىڭ اتقارۋشى ديرەكتورى قايرات سارىباي.

قازاقستان ءقازىر جاڭا جاستار ساياساتىن قالىپتاستىرىپ جاتىر. حالىقارالىق تاجىريبەگە سۇيەنىپ، ۇتىمدى تۇستارىن پايدالانۋ ماڭىزدى. وسى رەتتە جاستار كەڭەسىنىڭ ءرولى زور. سەبەبى، قۇرىلىم ازياداعى بەيبىتشىلىك پەن قاۋىپسىزدىكتى نىعايتۋدا بەلسەندى جۇمىس ىستەپ كەلەدى. قازىرگى گەوساياسي جاعدايدا كەڭەسە وتىرىپ، ورتاق شەشىم قابىلداۋ ماڭىزدى، دەيدى قاتىسۋشىلار. دەلەگاتتار ازياداعى ءوزارا ءىس-قيمىل جانە سەنىم شارالارى كەڭەسىنە قاراستى، جاستار ۇيىمدارىمەن ديالوگ پەن ارىپتەستىك قاتىناستارىن جانداندىرۋعا مۇددەلى.