ەلىمىزدە جاڭا تەلەفون كودى پايدا بولدى

جاڭا دۇنيە!

قازاقستاندا جاڭا +997 ءنومىرلى دەف كود بەلگىلەندى. سول سياقتى ەندىگى ۋاقىتتا ەلىمىزدەن سىرتقا قوڭىراۋ شالعاندا شەتەلدەگى ادامنىڭ تەلەفونىندا «قازاقستان» دەپ شىعىپ تۇرادى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.

اتالعان جاڭاشىلدىق تۋرالى ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين ءمالىم ەتتى.

«جاقسى جاڭالىق! بۇۇ جانىنداعى حالىقارالىق ەلەكتر بايلانىس وداعى قازاقستانعا جاڭا +997 دەف كودىن بەلگىلەدى. ەندى ءبىزدىڭ ەلدەن باسقا مەملەكەتكە قوڭىراۋ شالعاندا، شەتەلدىكتەردىڭ تەلەفونىندا قازاقستان دەگەن جازۋ شىعادى. سونداي-اق حالىقارالىق دەڭگەيدەگى سيفرلى سەرۆيستەردى قولدانعاندا دا، بارلىق جەردە قازاقستان دەگەن سيگنال شىعادى»، - دەپ جازدى باعدات مۋسنن ءوزىنىڭ Facebook پاراقشاسىندا.

ءمينيستردىڭ ايتۋىنشا، قازىرگى ۋاقىتتا ءتيىستى قۇجاتتار راسىمدەلىپ، جاڭا كودقا كوشۋ بويىنشا ءىس-شارالار اتقارىلىپ جاتىر.

«كەزىندە كسرو تاراعاندا، +7 حالىقارالىق تەلەفون كودى ەكى ەلگە بىردەي بەكىتىلگەن بولاتىن. ءبىز قازاقستانعا عانا تيەسىلى حالىقارالىق كودقا قول جەتكىزۋ ءۇشىن بىلتىردان بەرى تەلەكوممۋنيكاسيا سالاسىنداعى كومپانيالارمەن بىرگە جان-جاقتى جۇمىس جۇرگىزىپ كەلەمىز. وسى كەلىسسوزدەردىڭ ناتيجەسىندە ءبىزدىڭ ەلگە دەربەس +997 كودى بەكىتىلدى»، - دەيدى ۆەدومستۆو باسشىسى.