الماتىدا «قازىنا» بازارىنان ءورت شىقتى

ءورتتى سوندىرۋگە 40 مامان مەن 14 بىرلىك تەحنيكا جۇمىلدىرىلدى

الماتىداعى «قازىنا» بازارىندا حالىق تۇتىنۋ تاۋارلارى ساقتالعان ەكى قاباتتى بىرنەشە كونتەينەر ورتەنىپ كەتتى، دەپ حابارلايدى دەپ حابارلايدى Almaty-akshamy.kz الماتى تەلەارناسىنىڭ سايتىنا سىلتەمە جاساپ.

قالالىق تجد باسپا ءسوز قىزمەتىنىڭ مالىمەتىنشە، ءورت تۋرالى حابارلاما بۇگىن تۇسكى ساعات 12:14-تە تۇسكەن.

«الماتى قالاسى تجد كۇشتەرى مەن قۇرالدارى جوعارى دارەجەلى شاقىرتۋ بويىنشا الاتاۋ اۋدانى، سولتۇستىك اينالىم، 34 مەكەنجايىنداعى «قازىنا» ساۋدا ورنىنا جىبەرىلدى. ءورت سوندىرۋشىلەر وقيعا ورنىنا 6 مينۋتتا جەتتى. ولار جالپى الاڭى 120 شارشى مەتر اۋماعىندا ماتەريالدىق قۇندىلىقتارى بار بىرنەشە ەكى قاباتتى كونتەينەردىڭ جانىپ جاتقانىن انىقتادى. ءورتتىڭ جاقىن ماڭىندا ورنالاسقان كونتەينەرلەرگە كوشۋ ءقاۋپى تۋىندادى»، – دەلىنگەن قالالىق تجد حابارلاماسىندا.   

العاشقى بولىمشە بارلاۋ بارىسىندا «سۋ از قامتىلعان» اۋدان تۋرالى حابارلاعان، سوندىقتان ءورت ءسوندىرۋ اۆتوسيستەرنالارىمەن سۋ جەتكىزۋ جۇمىستارى دەرەۋ ۇيىمداستىرىلىپ، سۋ ۇزدىكسىز بەرىلىپ ۇلگەرگەن.

«وقيعا ورنىندا جەدەل شتاب، 2 جاۋىنگەرلىك ۋچاسكە قۇرىلدى. 40 مامان مەن 14 بىرلىك تەحنيكا جۇمىلدىرىلدى. جول پوليسياسىنىڭ كۇشىمەن جول قورشالدى»، – دەلىنگەن حابارلامادا.

شۇعىل قابىلدانعان شارالاردىڭ ارقاسىندا ءورت 18 مينۋتتا وقشاۋلاندى.