قازىرگى ۋاقىتتا ولاردىڭ 772ء-ى پاتەر الدى.
الماتىلىق ماماندار جاستارعا قالاي باسپانا الۋعا بولاتىنىن ايتىپ بەردى، دەپ حابارلايدى Almaty-akshamy.kz Almaty.tv سىلتەمە جاساپ.
الماتى تۇرعىن ءۇي ساياساتى باسقارماسى جەتەكشىسىنىڭ ورىنباسارى ەرمەك ءامىروۆتىڭ ايتۋىنشا، باسپانانى وتباسى بانكتىڭ «باقىتتى وتباسى» باعدارلاماسى ارقىلى الۋعا بولادى.
«بۇل باعدارلاما ارقاسىندا كوپ بالالى، تولىق ەمەس، مۇمكىندىگى شەكتەۋلى بالا تاربيەلەپ وتىرعان وتباسى نارىقتا جاڭا سالىنعان نەمەسە ەرتەرەكتە تاپسىرىلعان پاتەردى الا الادى. ءۇش جىل ىشىندە باعدارلاماعا 634 الماتىلىق وتباسى قاتىستى»، – دەدى ءامىروۆ بريفينگ بارىسىندا.
تۇرمىسى تومەن تۇرعىندار كەزەگىندەگىلەرگە تۇرعىن ءۇي سەرتيفيكاتى دا بەرىلەدى. ولاردى قايتارۋدىڭ قاجەتى جوق. بۇل سوما "وتباسى بانكىندەگى" جەڭىلدىكپەن بەرىلەتىن يپوتەكانىڭ العاشقى جارناسىن جابۋ ءۇشىن قاراستىرىلعان.
سەرتيفيكاتتى قالاي الۋعا بولادى:
سەرتيفيكات I جانە II توپ مۇگەدەكتەرىنە، جەتىم بالالارعا، مۇگەدەك بالا اسىراپ وتىرعان وتباسىعا، اتا-انا قامقورلىعىنسىز قالعان بالالارعا، كوپ بالالى وتباسىعا بەرىلەدى. بۇل ءۇشىن الماتى اكىمدىگى جەرگىلىكتى بيۋدجەتتەن 2 ميلليارد تەڭگە ءبولدى. سوماسى 1 ميلليون تەڭگە بولاتىن 2 000 قايتارىمسىز سەرتيفيكات تابىستالادى.
جۇمىس ىستەيتىن جاستار «الماتى جاستارى» باعدارلاماسىنا قاتىسا الادى. ونىڭ اياسىندا 1 000 جاس وتباسى باسپانامەن قامتىلدى.
«بيىل تاعى 1 000 جاس وتباسى باسپانالى بولادى. قازىرگى ۋاقىتتا ولاردىڭ 772ء-ى پاتەر الدى»،– دەدى ءامىروۆ.
بۇعان قوسا، تاعى 1 050 جۇمىس ىستەيتىن جاستى 5 جىلعا دەيىن جالعا بەرىلەتىن باسپانامەن قامتۋ جوسپارلانىپ وتىر.