ەلىمىزدە جاڭا كولىكتەر سانى ارتىپ كەلەدى

ەلىمىزدە اۆتوكولىك سانى ءبىر جىل ىشىندە 8،4 پايىزعا كوبەيىپ، بيىل ءساۋىردىڭ سوڭىندا 4،1 ملن-عا جەتتى، دەپ حابارلايدى Almaty-akshamy.kz.  

Ranking.kz پورتالىنىڭ مالىمەتىنشە، ءوسىم بارلىق جىل ساناتتارى بويىنشا بايقالادى. دەگەنمەن، شىققانىنا 3 جىل بولماعان كولىكتەردىڭ ەلەۋلى ءوسىمى تىركەلىپ وتىر. ولاردىڭ سانى بىردەن 31،1 پايىزعا ارتقان. سونىمەن قاتار انە-مىنە ەسكى كولىكتەر ساناتىنا كىرەيىن دەپ تۇرعان 10-20 جىلدىق كولىكتەر سانى دا 13،5 پايىزعا كوبەيگەن.

ەلىمىزدە ەسكى كولىكتەر ءالى كوپ. شىعارىلعانىنا 20 جىلدان اسقان اۆتوكولىكتەردىڭ سانى ءبىر جىلدا 4 پايىزعا ارتىپ، 2 ملن-عا جۋىقتادى، الايدا ولاردىڭ ۇلەسى 50،3 پايىزدان 48،3 پايىزعا دەيىن تومەندەدى، -دەپ جازدى قازاقپارات.

20 جىلدان اسقان ەسكى اۆتوكولىكتەردىڭ ەڭ كوپ سانى الماتى وبلىسىندا تىركەلگەن: 317،7 مىڭ، ودان كەيىن الماتى قالاسى (180،9 مىڭ) جانە قاراعاندى وبلىسى (157،6 مىڭ) تۇر.

بۇل رەتتە، پايىزدىق ۇلەس بويىنشا ەسكى كولىكتەر ەڭ كوپ وڭىرلەر - جامبىل (69،6%)، الماتى (64،9%) جانە وڭتۇستىك قازاقستان (66،6%) وبلىستارى. بۇرىنعى وڭتۇستىك قازاقستاندا تىركەلگەن كولىكتەر سانى 148،7 مىڭ بولسا، ونىڭ 99،1 مىڭى - ەسكى.

ەسكى كولىكتەردىڭ باعاسى بەسىنشى اي قاتارىنان تومەندەپ كەلەدى. ناتيجەسىندە، 2023 جىلدىڭ ماۋسىمىندا جۇرىلگەن جەڭىل اۆتوكولىكتەر بىلتىرعى سايكەس مەرزىمىمەن سالىستىرعاندا ءبىر ايدا 1،3 جانە ءبىر جىلدا 5،2 پايىزعا ارزاندادى.