ەلىمىزدە جاڭا حالىقارالىق اۋەجاي بوي كوتەرەدى

قازاقستاندا قورعاس تورابىندا جۇك جانە جولاۋشىلارعا ارنالعان جاڭا اۋەجاي سالىنادى، دەپ حابارلايدى Aqshamnews.kz ءتىلشىسى.

ساۋدا جانە ينتەگراسيا ءمينيسترى ارمان شاققالييەۆتىڭ ايتۋىنشا، قازاقستان–جۇڭگو شەكاراسىنداعى قورعاس تورابىندا SkyHansa جۇك-جولاۋشىلار اۋەجايى بوي كوتەرەدى. ول حابتى دامىتۋدىڭ نەگىزگى ەلەمەنتىنە اينالىپ، ءوڭىردىڭ وتكىزۋ قابىلەتىن ايتارلىقتاي ارتتىرۋعا مۇمكىندىك بەرەدى.

ءمينيستردىڭ مالىمەتىنشە، شەكارادا قىتايمەن بىرلەسكەن تولىققاندى لوگيستيكالىق كەشەن قۇرىلىپ جاتىر. جاڭا اۋەجاي ءترانزيتتى كۇشەيتىپ، جۇك اعىندارىنىڭ كولەمىن ۇلعايتۋعا جانە جاڭا باعىتتار اشۋعا جول اشادى.

قازىرگى ۋاقىتتا «قورعاس – شىعىس قاقپاسى» اەا اۋماعىندا 64 قاتىسۋشى تىركەلگەن. جالپى قۇنى 58،6 ملرد تەڭگە بولاتىن 32 ينۆەستيسيالىق جوبا جۇزەگە اسىرىلىپ، شامامەن 2 300 جۇمىس ورنى قۇرىلعان. ءىرى جوبالار قاتارىندا قازاقستان-قىتاي ونەركاسىپتىك قالاسى، جەل ەنەرگەتيكالىق قوندىرعىلار مەن ەنەرگيا ساقتاۋ جۇيەلەرىن وندىرەتىن زاۋىت، مەتالل بۇيىمدارى ءوندىرىسى، سونداي-اق كوفە جانە شاي سۋسىندارى زاۋىتى بار.

سونىمەن بىرگە حابتاعى لوگيستيكالىق ينفراقۇرىلىم اۋقىمدى جاڭعىرتۋدان ءوتىپ جاتىر: «Khorgos Gateway» تەرمينالى 18 تەمىرجول جەلىسىنە دەيىن كەڭەيتىلىپ، قىتايدىڭ ەركىن ەكونوميكالىق ايماعىمەن تىكەلەي لوگيستيكالىق ءدالىز قۇرىلىپ جاتىر. Sarens كومپانياسىنىڭ وندىرىستىك-لوگيستيكالىق كەشەنى مەن بوندتىق قويمالار دا سالىنىپ جاتىر.

ارمان شاققالييەۆتىڭ ايتۋىنشا، قورعاس تورابى قازاقستان مەن جۇڭگو اراسىنداعى ءوزارا ساۋدا مەن ەكونوميكالىق ىنتىماقتاستىقتى كۇشەيتەتىن ماڭىزدى بۋىنعا اينالىپ، شەكارادا تۇراقتى يندۋستريالىق ورتا قالىپتاستىرۋعا ىقپال ەتپەك.