2025 جىلعا دەيىن ستۋدەنتتەردىڭ ستيپەندياسى 2 ەسەگە، ماگيسترانتتار مەن دوكتورانتتارعا 1،5 ەسەگە ارتادى.
بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ۇكىمەت وتىرىسىندا ايتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
«ءبىلىمدى ۇلت» ساپالى ءبىلىم بەرۋ» ۇلتتىق جوباسى ءبىلىم بەرۋ جۇيەسىنىڭ باسەكەگە قابىلەتتىلىگى مەن حالىقارالىق بەدەلىن ارتتىرۋ ماقساتىندا جۇزەگە اسىرىلىپ جاتىر. جوعارى بىلىمگە قاتىستى نەگىزگى باعىتتارى - حالىقارالىق اككرەديتتەۋدەن وتكەن جاھاندىق ءبىلىم بەرۋ باعدارلامالارىن ىسكە اسىرۋعا قول جەتكىزىلەدى، شەتەلدىك ارىپتەستەرمەن اكادەميالىق الماسۋلار كەڭەيتىلەدى. 2025 جىلعا قاراي شەتەلدىك جەتەكشى بەس جوو-نىڭ فيليالى جۇمىس ىستەيدى»، - دەدى ساياسات نۇربەك.
ءمينيستردىڭ ايتۋىنشا، 2021-2022 وقۋ جىلىنا كونتينگەنتتىڭ جالپى سانى 623 839 ادامدى قۇرادى.
«بارلىعى – 120 جوو. 2021 جىلى تۇلەكتەردىڭ جۇمىسقا ورنالاسۋى – 68،9%-دى قۇرايدى. پروفەسسور-وقىتۋشىلار قۇرامىنىڭ جالپى سانى – 36 مىڭ ادام. مەملەكەت باسشىسىنىڭ تاپسىرماسىنا سايكەس گرانتتار سانى 2020 جىلى 65 مىڭنان 2022 جىلى 88 مىڭعا دەيىن ۇلعايتىلدى. سونداي-اق ستۋدەنتتەردىڭ ستيپەندياسى دا ارتىپ كەلەدى. باكالاۆريات ستۋدەنتتەرىنە 36 مىڭ تەڭگە، دوكتورانتتارعا 150 مىڭ تەڭگە قاراستىرىلعان. 2025 جىلعا دەيىن ستۋدەنتتەردىڭ ستيپەندياسى 2 ەسەگە، ماگيسترانتتار مەن دوكتورانتتارعا – 1،5 ەسەگە ارتادى»، - دەدى ول.