قالانىڭ مونيتورينگتىك توپتارى وتكەن اپتادا 13 زاڭدى تۇلعاعا قاتىستى حاتتاما تولتىردى
الماتىدا ءتۇن ورتاسىنا دەيىن Ashyq قوسىمشاسىنسىز جاسىرىن جۇمىس ىستەگەن كاسىپكەرلىك نىسانى انىقتالدى، دەپ حابارلايدى Almaty-akshamy.kz Almaty.tv-عا سىلتەمە جاساپ.
مەدەۋ اۋدانىنىڭ مونيتورينگتىك توبى ادەتتەگىدەي تەكسەرىسكە شىعىپ، ساتپايەۆ كوشەسىنىڭ بويىندا ورنالاسقان تۇنگى باردىڭ ۇستىنەن ءتۇستى. مەكەمە ساعات ءتىلى تۇنگى ساعات 00.00-دەن اسسا دا، جۇمىسىن توقتاتپاي، كەلۋشىلەردى شامادان تىس ارتىق قابىلداعان. ءتىپتى، مۇندا قورقور دا شەگىلىپتى.
«قۇرمەتتى كاسىپكەرلەر، كارانتين تالاپتارىن بۇزباي، سانيتارلىق نورمالاردى ساقتاپ جۇمىس ىستەڭىزدەر. ءقاۋىپتى ىندەتتىڭ بەتى ءالى دە قايتا قويعان جوق. ادامداردىڭ دەنساۋلىعىمەن ويناماي، جاۋاپكەرشىلىكپەن قارايىق»، – دەدى مەدەۋ اۋداندىق Nur Otan پارتياسىنىڭ وكىلى نۇرجان ەردەمبەكوۆ.
تەكسەرۋشى توپ وكىلدەرى كوپ ۇزاماي تولە بي كوشەسىنىڭ بويىندا ورنالاسقان ءدامحانانىڭ دا جۇمىسىن اشكەرەلەدى. كاسىپكەرلىك نىسان وسى ۋاقىتقا دەيىن Ashyq-قا قوسىلماي، ءتۇن ورتاسىنا دەيىن جاسىرىن جۇمىس ىستەپ كەلگەن. باس سانيتاردىڭ قاۋلىسىنا سايكەس، ءموبيلدى قوسىمشاسى جوق مەكەمەلەر كەشكى 21.00-گە دەيىن عانا ادام قابىلداي الادى. كەيىن ماماندار انىقتالعان فاكتىلەر بويىنشا كافە يەسى مەن كەلۋشىلەرگە حاتتاما تولتىردى.
«مەدەۋ اۋدانىندا 4 مونيتورينگتىك توپ جۇمىس ىستەيدى. ولار كۇنى-تۇنى تەكسەرىس جۇرگىزىپ، بارلىق مەكەمەنى باقىلاۋدا ۇستاپ وتىر. اسىرەسە، بەتپەردە رەجيمى، الەۋمەتتىك اراقاشىقتىق، مەرەكەلىك جيىنداردا سانيتارلىق تالاپتاردىڭ ساقتالۋى قاتاڭ تەكسەرىلەدى»، – دەدى مەدەۋ اۋداندىق كاسىپكەرلىكتى جانە ونەركاسىپتى دامىتۋ ءبولىمىنىڭ باس مامانى ارمان ساپاروۆ.
ايتا كەتەيىك، مەدەۋ اۋداندىق مونيتورينگتىك توپتارى سوڭعى اپتادا 300-دەن استام مەكەمەدە تەكسەرىس جۇرگىزىپ، 13 زاڭدى تۇلعاعا حاتتاما تولتىرعان.