وكق-دا وتكەن باسپا ءسوز كونفەرەنسياسى بارىسىندا اۋىل شارۋاشىلىعى ۆيسە-مينيسترى امانعالي بەردالين ەپيزووتيالىق جاعدايدى ساقتاۋ بويىنشا قابىلدانىپ جاتقان شارالار تۋرالى مالىمدەدى.
ونىڭ ايتۋىنشا، سۋ تاسقىنى سالدارىنان اقتوبە، باتىس قازاقستان جانە سولتۇستىك قازاقستان وبلىستارىندا 12 ءسىبىر جاراسى كومىندىسىن، سونداي-اق بقو-دا 8 مال قورىمىن سۋ باستى، دەپ حابارلايدى Almaty-akshamy.kz اۋىل شارۋاشىلىعى مينيسترلىگىنە سىلتەمە جاساپ.
مينيسترلىكتىڭ اۋماقتىق بولىمشەلەرى رەسپۋبليكالىق ۆەتەريناريالىق زەرتحانامەن بىرلەسىپ، وسى كومۋ ورىندارىنان سۋ كەتكەننەن كەيىن توپىراق ۇلگىلەرىن الدى. تەرىس ناتيجەلەر الىنعاننان كەيىن بارلىق كومۋ ورىندارى پروفيلاكتيكالىق دەزينفەكسيا جۇمىستارى جۇرگىزىلدى.
"پروفيلاكتيكالىق ءىس-شارالار، سونىڭ ىشىندە جانۋارلاردى اسا ءقاۋىپتى اۋرۋلارعا قارسى ۆاكسينالاۋ ناتيجەسىندە ەپيزووتيالىق جاعداي ساقتالىپ، اۋرۋلار تارالۋىنىڭ الدىن الۋعا قول جەتكىزىلدى.
قازىرگى ۋاقىتتا 23 اۋرۋعا قارسى پروفيلاكتيكالىق ۆاكسيناسيا جۇرگىزىلۋدە، 178،2 ملن. مانيپۋلياسيا جۇرگىزۋ جوسپارلانعان.
جانۋارلاردىڭ ءقاۋىپتى جانە سوزىلمالى جۇقپالى اۋرۋلارىن انىقتاۋ ماقساتىندا جانۋارلاردىڭ 26 اسا ءقاۋىپتى اۋرۋلارى بويىنشا 74،9 ملن دياگنوستيكالىق زەرتتەۋ جۇرگىزۋ جوسپارلانعان"، - دەپ اتاپ ءوتتى ۆيسە-مينيستر.
جانۋارلاردىڭ، ونىڭ ىشىندە ادامدار مەن جانۋارلارعا ورتاق جۇقپالى اۋرۋلارىنىڭ قوزدىرعىشتارىن اكەلۋدى جانە تاراتۋدى بولدىرماۋ ماقساتىندا ۆەتەريناريالىق-سانيتاريالىق ءىس-شارالار جۇرگىزىلۋدە.
ءۇشىنشى ەلدەرگە جانە ەاەو ەلدەرىنە قاتىستى 2024 جىلى قازاقستان اۋماعىندا جوعارى پاتوگەندى قۇس تۇماۋىنا (اۆستراليا، ءۇندىستاننىڭ 4 شتاتى، اقش-تىڭ 30 شتاتى)، افريكالىق شوشقا وباسىنا (يتاليا، پولشا، وار)، قوي مەن ەشكى شەشەگىنە (گرۋزيا)، ۇساق كۇيىس قايىراتىنداردىڭ وباسىنا (گرۋزيا) ۋاقىتشا شەكتەۋلەر ەنگىزىلدى.
ق ر دسم سانيتارلىق-ەپيدەميولوگيالىق باقىلاۋ كوميتەتىمەن ۆەدومستۆوارالىق ءوزارا ءىس-قيمىل شەڭبەرىندە جانە 2024 جىلعا ارنالعان تاماق قاۋىپسىزدىگى بويىنشا مەملەكەتتىك مونيتورينگ جوسپارىن ىسكە اسىرۋ بارىسىندا كوميتەت ەاەو ەلدەرىنىڭ 3 كاسىپورنى مەن ءسۇت جانە ءسۇت ونىمدەرى بويىنشا 5 كاسىپورىنعا قاتىستى ەت ونىمدەرى بويىنشا ۆەتەريناريالىق-سانيتاريالىق شارالار قابىلدادى.
ق ر مەملەكەتتىك شەكاراسى ارقىلى باقىلاۋداعى تاۋارلارمەن اۆتوكولىك قۇرالدارىن وتكىزۋ كەزىندە ۆەتەرينارلىق-سانيتارلىق ەرەجەلەردىڭ بۇزىلۋىنا بايلانىستى 458 اۆتوكولىك قۇرالىمەن مال شارۋاشىلىعى ونىمدەرىن اكەلۋگە جول بەرىلمەگەن.
ۆەتەريناريالىق باقىلاۋدى كۇشەيتۋ شەڭبەرىندە ۆەتەريناريالىق جۇيەنى سيفرلاندىرۋ بويىنشا جۇمىس جۇرگىزىلۋدە، بۇل ءونىمنىڭ قوزعالىسىن نەعۇرلىم ءتيىمدى باقىلاۋعا جانە ونىڭ سيفرلىق قاداعالانۋىن قامتاماسىز ەتۋگە مۇمكىندىك بەرەدى.
بۇگىنگى تاڭدا مال شارۋاشىلىعى ونىمدەرىنىڭ قاداعالانۋ ءمودۋلى پيلوتتىق رەجيمدە بارلىق وڭىرلەردە ىسكە اسىرىلۋدا جانە 2024 جىلدىڭ سوڭىنا قاراي اياقتالادى.
وعان 1600-دەن استام مال سويۋ نىسانى، ۆەتەريناريالىق-سانيتاريالىق ساراپتاما زەرتحانالارى، ساۋدا نىساندارى قوسىلعان، 89 مىڭ №2 نىساندى ۆەتەريناريالىق انىقتاما جانە 334 مىڭ ساراپتاما اكتىسى رەسىمدەلگەن.
"مينيسترلىك قابىلداعان شارالاردىڭ ناتيجەسىندە، رف مەن قحر ەنگىزگەن اۋسىل بويىنشا شەكتەۋلەر الىنىپ تاستالدى، رەسەي مەن جۇڭگو نارىقتارىنا مال شارۋاشىلىعى ونىمدەرىنىڭ ەكسپورتى قايتا جانداندى.
بۇگىنگى تاڭدا كاسىپورىندار جۇڭگو نارىعىنا مۇزداتىلعان سيىر ەتىن ەكسپورتتاۋعا رۇقسات الۋ ءۇشىن قحر تىزىلىمىندە تىركەۋ راسىمىنەن وتۋدە.
جۇڭگو، ۆەتنام، سينگاپۋر، مالايزيا، ەو، جاپونيا، يران، ءازىربايجان، پارسى شىعاناعى ەلدەرىمەن ەكسپورتتالاتىن تاۋارلار تىزبەگىن كەڭەيتۋ بويىنشا جۇمىس جالعاسۋدا "، - دەپ ءسوزىن قورىتىندىلادى ا.بەردالين.
اۋىل شارۋاشىلىعى مينيسترلىگى ەپيزووتيالىق جاعدايدى ساقتاۋ، اۋىل شارۋاشىلىعى ونىمدەرىنىڭ قاۋىپسىزدىگى مەن ساپاسىن قامتاماسىز ەتۋ ماقساتىندا بارلىق قاجەتتى شارالاردى قابىلداۋدى جالعاستىرۋدا