ەلىمىزدە ەندى قوسالقى بولشەك رەتىندە سىرتتان اكەلىنگەن اۆتوكولىكتەردى زاڭداستىرۋعا بولادى

مۇنداي كولىك قۇرالدارىن باستاپقى تىركەۋ ءۇشىن الىم مولشەرلەمەسى 200 مىڭ تەڭگەنى قۇرايدى.

جىل باسىنان بەرى مەملەكەت باسشىسىنىڭ تاپسىرماسىن ورىنداۋ اياسىندا قازاقستاندىقتارعا 2022 جىلعى 1 قىركۇيەككە دەيىن قازاقستانعا اكەلىنگەن شەتەلدىك اۆتوكولىكتەردى زاڭداستىرۋعا مۇمكىندىك بەرىلدى.

ۇكىمەتتىڭ باسپا ءسوز قىزمەتىنىڭ مالىمەتىنشە، بۇعان دەيىن ەلگە قوسالقى بولشەكتەر رەتىندە اكەلىنگەن كولىك يەلەرى رەسمي تىركەۋ قۇجاتتارىنىڭ جوقتىعىنان قيىندىقتارعا تاپ بولدى. ۇكىمەت بۇل ماسەلەنى شەشۋ ءۇشىن ازاماتتارعا كونسترۋكتور-اۆتوكولىكتەردى زاڭداستىرۋعا جانە باستاپقى تىركەۋدى جۇزەگە اسىرۋعا مۇمكىندىك بەرەتىن ءتيىستى ەرەجەلەرگە وزگەرىستەر ەنگىزد، دەپ حابارلايدى Almaty-akshamy.kz.

تىركەلۋ ءۇشىن ءوتىنىش، ىشكى ىستەر ورگاندارىنىڭ ۋاكىلەتتى قىزمەتكەرى بەرگەن كولىك قۇرالىن تەكسەرىپ-قاراۋ اكتىسى، تەحنيكالىق تەكسەرىپ-قاراۋدىڭ دياگنوستيكالىق كارتاسى بولۋى قاجەت.

اۆتوكولىكتەردى زاڭداستىرۋ ءۇشىن وتىنىمدەردى Egov قىزمەتتەرى جانە ەكىنشى دەڭگەيلى بانكتەردىڭ ءموبيلدى قوسىمشالارى ارقىلى بەرۋگە بولادى.

ايتا كەتۋ كەرەك، قازاقستانعا قوسالقى بولشەكتەر تۇرىمەن اكەلىنگەن جانە كەدەندىك تازارتۋدان وتپەگەن اۆتوكولىكتى تىركەۋ كۋالىگىندە مەنشىك قۇقىعىن وزگەرتۋگە تىيىم سالۋ جانە تەك قازاقستان اۋماعىندا پايدالانۋعا رۇقسات بەرۋ تۋرالى جازبا كورسەتىلەدى.

ىشكى ىستەر مينيسترلىگىنىڭ مالىمەتىنشە، اكسيا باستالعالى رەسپۋبليكا بويىنشا 107 مىڭنان استام كولىك زاڭداستىرىلعان. سونىمەن قاتار 14 مىڭعا جۋىق كونسترۋكتور-اۆتوكولىك انىقتالعان.