المات قوداسبايەۆ، الماتى قالاسى ءماسليحاتىنىڭ دەپۋتاتى:
- جۇڭگو مەن قازاقستان اراسىنداعى ۆيزالىق رەجيمدى جەڭىلدەتۋ، اتاپ ايتقاندا، 30 كۇنتىزبەلىك كۇنگە دەيىن ۆيزاسىز رەجيمدى ەنگىزۋ ماسەلەسى ءبىرازدان بەرى قوعامنىڭ قىزۋ تالقىسىنا ءتۇسىپ جاتىر. حالىقتىڭ الاڭداۋى زاڭدى. ويتكەنى جۇڭگو ازاماتتارىنىڭ يمميگراسياسى رەتسىزدەۋ ەكەنى راس. ءبىراق 2022 جىلدان باستاپ جۇڭگو ازاماتتارى ءۇشىن ۆيزاسىز رەجيم قولدانىستا. دەگەنمەن حالىقتىڭ اعىنى ايتارلىقتاي كۇشتى دەۋگە كەلمەيدى.
30 كۇنتىزبەلىك كۇنگە دەيىن ۆيزاسىز رەجيمدى ەنگىزۋدىڭ ەلىمىز ءۇشىن ۇتىمدى تۇستارى كوپ. تۋريزم جانە جاپپاي كاسىپكەرلىك سالاسىنداعى ەلىمىزدىڭ الەۋەتى ءۇشىن ۇلكەن مۇمكىندىك. سونداي-اق قىتايدا ءبىزدىڭ قانداستار دا تۇرادى ەمەس پە، ولارعا تاريحي وتانىنا ساياحات جاساۋ، دوستارى مەن تۋىستارىنا كەلۋ وڭايىراق بولادى. زەينەتكەر قىتايلىقتار الەمدەگى ەڭ بەلسەندى تۋريستەردىڭ ءبىرى، بۇل قازاقستانداعى ءتۋريزمنىڭ دامۋىنا جاعىمدى اسەر ەتەدى. سونىمەن قاتار، قانداي دا ءبىر جاعىمسىز سالدارلار تۋىنداعان كەزدە شارتتىڭ كۇشىن جويۋ مۇمكىندىگى ءارقاشان بار.
جۇڭگو قاشان دا قازاقستاننىڭ ماڭىزدى ەكونوميكالىق سەرىكتەستەرىنىڭ ءبىرى بولىپ قالا بەرەدى جانە بۇل - ەكى ەلدىڭ بيزنەسىنىڭ ىنتىماقتاستىعىن دامىتۋعا جاقسى مۇمكىندىك. ءبىزدىڭ كاسىپكەرلەرىمىزدىڭ مۇنداي ۇلكەن نارىقتى پايدالانباۋى اقىلعا قونىمسىز بولار ەدى دەپ سانايمىن.
بۇل جاعداي ءبىزدىڭ ءتولقۇجاتىمىزدىڭ يندەكسىن ارتتىرىپ، ۋاقىت وتە كەلە، قازاقستاندىقتار ءۇشىن ۆيزاسىز ەلدەر ءتىزىمىنىڭ ءوسۋ ىقتيمالدىعىن ارتتىراتىنى دا ماڭىزدى. ۇشىنشىدەن، كوپتەگەن رەيستەر اشىلاتىندىعىن ەسكەرە وتىرىپ، تاۋارلار اسسورتيمەنتى كەڭەيەدى: قانداي دا ءبىر كورمەگە بارۋ، مىسالى، جاڭالىقتاردى جەتكىزۋ تۋرالى شارت جاساسۋ، جونەلتۋدى، تيەۋدى ۇيىمداستىرۋ جانە باقىلاۋ جۇمىستارى جاندانا تۇسەدى.