ماماندار مۇنى دۇرىس تاماقتانۋ ەرەجەلەرىن ۇستانباۋمەن بايلانىستىرىپ وتىر.
اعزاعا كەرى اسەرىن تىگىزبەي، گەموگلوبيندى قالاي كوتەرۋگە بولادى؟
تارازدىق ءبىرجان قوڭىروۆ 2 جاسار ۇلىنىڭ ءبىر اپتا بۇرىن قىزىلشامەن اۋىرعانىن ايتادى. باستاپقىدا ينفەكسيانى بارلىق بالا سەكىلدى قابىلداعان. ءبىراق بىرەر كۇننەن سوڭ السىرەپ، ءجۇرىپ تۇرۋعا شاماسى كەلمەدى، دەيدى. جاعدايى ناشارلاپ، اقىرى جانساقتاۋ بولىمىنەن ءبىر شىعىپتى. جەدەل ساراپتاما العان دارىگەرلەر قانداعى تەمىر كولەمى شامادان تىس تومەندەپ كەتكەنىن ايتقان، دەپ حابارلايدى Almaty-akshamy.kz 24.kz-كە سىلتەمە جاساپ.
«ەشتەڭەگە قيمىلداي المايدى، ەشتەڭەگە شاماسى جەتپەيدى. كوتەرىپ جۇرە بەر دەيدى. ءبىز ونى قىزىلشامەن اۋىردى، ويباي، سودان كوڭىل-كۇيى بولماي جاتىر دەيمىز. ال بۇل سويتسەك، ىشىندەگى قانعا دا بايلانىستى ەكەن عوي. مۇلدە 47-گە ءتۇسىپ كەتىپتى عوي جاڭاعى گەموگلوبين تەمىرى. ۋاقىتىندا بولنيساعا كەپ، ۋاقىتىندا كورسەتىپ بىلىكتى ماماندارعا»، - دەيدى قالا تۇرعىنى ءبىرجان قوڭىروۆ.
گەماتولوگتار تەمىر تاپشىلىق انەمياسى ءقازىر بالالاردا ءجيى كەزدەسەتىنىن ايتادى. جۇكتىلىك كەزىندە انا اعزاسىندا تەمىر تاپشىلىعى بولسا، قۇرساقتاعى بالادا دا دامۋى مۇمكىن. سونىمەن قوسا ءبىر جاسقا دەيىنگى سابيگە قوسىمشا تاماق بەرۋ دە اتالعان دياگنوزعا اكەلۋى ىقتيمال. دارىگەرلەر ونى بالانىڭ ەستە ساقتاۋ قابىلەتىنىڭ تومەندەۋىنە الىپ كەلەدى، دەپ وتىر. سوندىقتان دەر كەزىندە بيوحيميالىق اناليز جاساتىپ ەمدەتپەسە، ءسابيدىڭ بويى وسپەي قالۋى عاجاپ ەمەس.
«تەمىر پرەپاراتتارىن ءبىرىنشى دارەجەسىندە 1 اي كولەمىندە ىشەدى. ەكىنشى، ءۇشىنشى دارەجەسىندە تەمىر پرەپاراتتارىن ءبىز تاعايىندايمىز 2-3 ايعا. تەرىسى بوزعىلت بولىپ سودان كەيىن تىرناقتارى سىنعىش بولىپ جاتسا شاشتارى تۇسكىش بولىپ جاتسا ۋچاسكەلىك دارىگەرىنە اپارىپ قان ءاناليزىن تاپسىرىپ سوسىن بيوحيميالىق ءاناليزدى سول جەردەن تەمىر مەن فەرەتيننىڭ مولشەرىن انىقتاپ»، - دەيدى وبلىستىق بالالار اۋراحانىسىنىڭ ءبولىم مەڭگەرۋشىسى گۇلفيا مۇقاتايەۆا.
ال استانالىق سايا ارتىقوۆانىڭ جاسى 31-دە. سوڭعى جىلدارى ءوزىن ءالسىز ءارى جايسىز سەزىنىپ جۇرگەن. بۇلاي جالعاسا بەرۋىن قالاماعان ول، دارىگەردىڭ قابىلداۋىنا بارادى. ناتيجەسىندە قانداعى گەموگلوبيننىڭ تومەندەپ كەتكەنى بەلگىلى بولعان.
«كوبىنە اق حالاتتىلارعا بارىپ تەكسەرىلۋ شارالارىن كەيىنگە قالدىرىپ جاتامىز. نەگىزى ول دۇرىس ەمەس. ماعان دارىگەر دياگنوزىما قاراپ، دۇرىس تاماقتانۋ كەرەكتىگىن ايتتى. ارنايى ديەتا ەرەجەسىن ءتۇسىندىرىپ بەردى. قۇرامىندا تەمىر پرەپاراتتارى بار بىرنەشە بيولوگيالىق بەلسەندى قوسپالاردى ىشۋگە كەڭەس بەردى»، - دەيدى ەمدەلۋشى سايا ارتىقوۆا.
بيولوگيالىق بەلسەندۋ قوسپالار دەمەكشى، ونى تەك دارىگەردىڭ رۇقساتىمەن عانا ىشۋگە كەڭەس بەرىلەدى. مىسالى اعزادا تەمىر الماسۋ پروسەسى بۇزىلعان ادامدارعا بۇل پرەپاراتتاردى تۇتىنۋ - باۋىر سيرروزىنا نەمەسە قانت ديابەتىنە اكەلۋى مۇمكىن، دەيدى ماماندار.
«بيولوگيالىق بەلسەندى قوسپالاردى تۇتىنۋعا كەڭەس بەرىلمەيدى. سەبەبى ونى رەتسىز پايدالانسا، ءتۇرلى اۋرۋلارعا اكەلىپ سوعادى. سوندىقتان ونى نەگىزگى تاعايىندالاتىن دارىلەر قاتارىنا جاتقىزا المايمىز. ولاردىڭ قۇرامىندا تەك تەمىر ەمەس، كالسيي، ماگنيي سەكىلدى كوپتەگەن ميكروەلەمەنت بار. ال ول ورگانيزمگە تۇسسە، وندا تەمىردىڭ ادام بويىنا سىڭۋىنە كەدەرگى بولادى»، - دەيدى دارىگەر-گەماتولوگ ايجان نۇرعالييەۆا.
.