بالالار دەنساۋلىعىن ساقتاۋداعى باستى جەتىستىكتەردىڭ ءبىرى نەوناتولوگياداعى جوعارى مامانداندىرىلعان كومەكتى دامىتۋ بولىپ تابىلادى، دەپ حابارلايدى aqshamnews.kz.
«نەوناتالدىق حيرۋرگيانىڭ دامۋىمەن جانە وسى تەحنولوگيالاردىڭ وڭىرلەرگە اۋىسۋىمەن تۋا بىتكەن اقاۋلارى بار جاڭا تۋعان نارەستەلەردىڭ ءومىر ءسۇرۋ دەڭگەيى 86%-دى قۇرادى. ورتاشا العاندا، جىل سايىن تۋا بىتكەن كەمىستىگى بار 1500 جاڭا تۋعان نارەستە جەدەل ەم الادى، ونىڭ 40%-ى ەندوۆيدەوحيرۋرگيا ادىسىمەن وپەراسيا جاسالادى»، - دەپ اتاپ ءوتتى دەنساۋلىق ساقتاۋ ءمينيسترى اقمارال ءالنازاروۆا قازاقستان رەسپۋبليكاسى پرەزيدەنتىنىڭ جانىنداعى ادام قۇقىقتارى جونىندەگى كوميسسيا وتىرىسىندا.
ءتيىمدى پەريناتالدىق تەحنولوگيالاردى ەنگىزۋدىڭ، جاڭا تۋعان نارەستەلەردىڭ رەانيماسياسىن دامىتۋدىڭ ارقاسىندا دەنە سالماعى وتە تومەن بالالاردىڭ ءومىر ءسۇرۋ دەڭگەيى 4 ەسە ارتتى.
قازاقستان ورتالىق ازيادا تۋعاننان باستاپ كارديوحيرۋرگيالىق وپەراسيالار جۇرگىزىلەتىن جالعىز مەملەكەت بولىپ تابىلادى. جىلىنا ورتا ەسەپپەن 2000-عا دەيىن اشىق جۇرەككە وپەراسيا، تۋا بىتكەن جۇرەك اقاۋلارى بار بالالارعا، ونىڭ ىشىندە 75%-ى ءبىر جاسقا دەيىنگى بالالارعا جاسالادى.
ەلىمىزدە بالالار ونكولوگتارى مەن گەماتولوگتارىنىڭ ديناميكالىق بايقاۋىندا قاتەرلى ىسىكتەردىڭ رەميسسياسىنداعى 4 مىڭعا جۋىق بالا باقىلانادى، جىلىنا بالالاردا 600-گە دەيىن قاتەرلى ىسىك انىقتالادى.
تەراپيا ادىستەرى جەتىلدىرىلۋدە، مولەكۋلالىق-گەنەتيكالىق دياگنوستيكا ەنگىزىلۋدە، اعزانى ساقتايتىن وپەراسيالار جۇرگىزىلۋدە، سوڭعى 10 جىلدىڭ ىشىندە ەلىمىزدە گەموپوەزدىك ءدىڭ جاسۋشالارىن، ونىڭ ىشىندە شەتەلدىك دونورلارمەن تۋىس ەمەس 452 ترانسپلانتاتتاۋ جاسالدى.
رەسپۋبليكادا تۋا بىتكەن دامۋ كەمىستىگى بار بالالاردى ەمدەۋگە ارنالعان 17 ەرتە ارالاسۋ ورتالىعى اشىلدى جانە جۇمىس ىستەيدى.