ساۋد ارابياسى مۇناي باعاسىنىڭ 100 دوللار دەڭگەيىندەگى بەيرەسمي باعدارىنان باس تارتىپ، "قارا التىن" ءوندىرىسىن كۇرت ارتتىرۋدى جوسپارلاپ وتىر.
بۇل الەمدىك مۇناي نارىعى مەن قازاقستانعا دا اۋىر سوققى بولۋى مۇمكىن. نە بولىپ جاتىر؟
Oil & Gas Journal Financial Times-قا سىلتەمە جاساي وتىرىپ، ساۋد ارابياسى الەمدىك مۇناي باعاسىن تومەندەتۋ مۇمكىندىگىن بايىپتى تۇردە قاراستىرىپ جاتقانىن جازادى. باسقا وپەك+ مۇشەلەرى سياقتى، پاتشالىق قازان ايىنان باستاپ مۇناي ءوندىرۋدى قىسقارتۋ ساياساتىنان باس تارتۋدى جوسپارلاعان. الايدا بۇل جوسپاردى ەكى ايعا كەيىنگە قالدىردى، ناتيجەسىندە باعا ۋاقىتشا 2021 جىلدىڭ جەلتوقسانىنان بەرى ەڭ تومەنگى دەڭگەيگە — باررەلىنە 70 دوللارعا دەيىن ءتۇستى. ءقازىر ساۋد بيلىگى مۇناي ءوندىرىسىن قايتا ارتتىرۋدى كوزدەپ وتىر، بۇل مۇناي باعاسىن قايتادان تومەندەتۋى مۇمكىن، دەپ حابارلايدى aqshamnews.kz.
2022 جىلى مۇنايدىڭ ورتاشا باعاسى باررەلىنە 99 دوللاردى قۇراعان ەدى — بۇل سەگىز جىل ىشىندەگى ەڭ جوعارعى كورسەتكىش بولاتىن. الايدا سودان بەرى "قارا التىن" باعاسى باررەلىنە 73 دوللارعا دەيىن تومەندەدى، ال وپەك ەلدەرىنىڭ نارىقتاعى ۇلەسى تاريحي مينيمۋمعا دەيىن قىسقاردى — ولاردىڭ ورنىن باسقا ەلدەر، اسىرەسە اقش، باسىپ الدى.
بۇل جاعداي ساۋد ارابياسىن الاڭداتىپ وتىر. پاتشالىق نارىقتاعى كوشباسشىلىعىن قايتارۋ ءۇشىن، ءتىپتى ۋاقىتشا باعانى تومەندەتۋ ارقىلى، نارىقتى ءوز مۇنايىمەن "تولتىرۋدى" جوسپارلاپ وتىر.
PVM Oil Associates Ltd كومپانياسىنىڭ مۇناي ساراپشىسى تاماش ۆارگانىڭ ايتۋىنشا، ساۋد ارابياسىنىڭ مۇناي ءوندىرىسىن ارتتىرۋ تۋرالى جوسپارى تۋرالى جاڭالىقتىڭ ءوزى-اق 26 قىركۇيەكتە الەمدىك مۇناي باعاسىنىڭ تومەندەۋىنە جەتكىلىكتى بولدى.