جوعارى اۋديتورلىق پالاتا مۇشەسى تىلەگەن كاسكيننىڭ ايتۋىنشا، اۋديت بارىسىندا فارماسيەۆتيكالىق ءونىم اينالىمى سالاسىنداعى 36 جۇيەلىك كەمشىلىك انىقتالدى. ولار وتاندىق تاۋار وندىرۋشىلەردى مەملەكەتتىك قولداۋ شارالارىنا، باعا بەلگىلەۋگە، ساتىپ الۋ جانە لوگيستيكا پروسەستەرىنە، ينسپەكسيالار جۇرگىزۋگە جانە دارى-دارمەكتەردىڭ قاۋىپسىزدىگىن باعالاۋعا قاتىستى.
"دەنساۋلىق ساقتاۋ سالاسىنداعى باعدارلامالىق قۇجاتتاردىڭ ىسكە اسىرىلۋىن تالداۋ فارماسيەۆتيكا سالاسىن دامىتۋ بويىنشا كەشەندى ءتاسىلدىڭ جوقتىعىن كورسەتەدى. وسىلايشا، قولداۋ شارالارى وتاندىق فارماسيەۆتيكالىق ءوندىرىستى دامىتۋدىڭ باسىم باعىتتارى ەسكەرىلمەي جانە جەرگىلىكتى ەتۋ دەڭگەيىنە قاراماستان كورسەتىلەدى. دارىلىك زاتتاردى شىعارۋ كەزىندە قازاقستاندىق شيكىزات ءىس جۇزىندە پايدالانىلمايدى، ال اكەلىنەتىن كومپونەنتتەردىڭ ساپاسىنا قويىلاتىن تالاپتار بەلگىلەنبەگەن. جالپى، وتاندىق دارىلىك زاتتار مەن مەديسينالىق بۇيىمداردى وندىرۋشىلەردىڭ مەملەكەتتىك قولداۋ شارالارىمەن قامتىلۋى 20%-دان تومەن. 2023 جىلعى ساۋدا-ساتتىق قورىتىندىسى بويىنشا نارىقتاعى وتاندىق دارى-دارمەكتەردىڭ ۇلەسى 18%-دى قۇراعان"،- دەپ حابارلادى جوعارى اۋديتورلىق پالاتا.
باعالاردى مەملەكەتتىك رەتتەۋ ءتيىستى دارەجەدە جۇرگىزىلمەيدى.
شەكتى باعالاردى قالىپتاستىرۋ "پايىزعا پايىز" قاعيداتى بويىنشا ۇستەمە باعانى بەلگىلەۋگە نەگىزدەلگەن، بۇل نورماتيۆتىك تۇردە پرەپاراتتاردىڭ قۇنىن ءوندىرۋشى زاۋىت باعاسىنان 172%-عا دەيىن ارتتىرۋعا مۇمكىندىك بەرەدى.
"دەنساۋلىق ساقتاۋ مينيسترلىگى شەكتى باعالاردى قالىپتاستىرۋ ادىستەمەسىن باعانى جۇزدەگەن پايىزعا كوتەرۋگە بولاتىنداي ەتىپ ازىرلەگەن. باعا بەلگىلەۋ ادىستەمەسى مۇلدەم قاتە. نەلىكتەن دەڭگەيلەس ەلدەردەگى باعا تالداۋ جۇرگىزىلمەيدى؟ ءقازىر بارلىق باعا بەلگىلەۋ ءوندىرۋشى زاۋىتتىڭ مالىمەتتەرىنە نەگىزدەلگەن. بۇل ءتاسىل دۇرىس ەمەس"، – دەدى ءاليحان سمايىلوۆ.
دەنساۋلىق ساقتاۋ ءمينيسترى جوعارى اۋديتورلىق پالاتانىڭ ۇسىنىمدارىن ەسكەرە وتىرىپ وسى باعىتتا ءتيىستى جۇمىس جۇرگىزىلەتىنىن اتاپ ءوتتى.
"باعا بەلگىلەۋگە، ونىڭ اشىقتىعى مەن وبەكتيۆتىلىگىنە قاتىستى سۇراق وتە كوپ. كوتەرمە-بولشەك ساۋدا سەگمەنتى ءۇشىن دە، تمككك جانە ءمامس شەڭبەرىندە ساتىپ الۋ بولىگىندە باعا بەلگىلەۋدە دە سۇراقتار بار. جوعارى اۋديتورلىق پالاتا تالداۋىنىڭ ناتيجەلەرىنە كەلەتىن بولساق، 6،5 مىڭنان استام پرەپاراتتىڭ باعاسى تەكسەرىلەتىن بولادى. جۇمىس توبى قۇرىلدى. ولاردى ىرىكتەۋگە قاتىستى دا سۇراقتار بار. جىل سوڭىنا دەيىن ءبىز تمككك جانە ءمامس شەڭبەرىندە، سونداي-اق كوتەرمە-بولشەك ساۋدا سەگمەنتىندە بەلگىلەنگەن باعالاردىڭ بارلىق سپەكترىن تۇتاستاي قايتا قارايمىز دەپ ويلايمىن"، – دەدى اقمارال ءالنازاروۆا.
جوعارى اۋديتورلىق پالاتا ءتوراعاسى سونىمەن قاتار مەملەكەتتىك رەتتەۋ سالاسى تىركەلمەگەن دارىلىك زاتتاردىڭ باعاسىن قامتىمايتىنىنا نازار اۋداردى، بۇل ءوندىرۋشى زاۋىت باعاسىنىڭ 2000%-نا دەيىن ۇستەمە باعا بەلگىلەۋگە مۇمكىندىك بەرىپ وتىر.
سونىمەن بىرگە مەملەكەتتىك اۋديت باعا بەلگىلەۋ تەتىگىنىڭ كەمشىلىكتەرى "سك-فارماسيا" جشس-نىڭ جەكەلەگەن دارىلىك زاتتار مەن مەديسينالىق بۇيىمداردى نارىقتىق باعادان 40%-365% جوعارى باعامەن ساتىپ الۋىنا اكەلىپ سوققانىن انىقتادى، بۇل 8 ملرد تەڭگەدەن اسىپ وتىر.