سىرتقى ەكونوميكالىق قىزمەتپەن اينالىساتىن قازاقستاندىق كاسىپكەرلەر ءۇشىن جاقسى جاڭالىق.
«اتامەكەن» ۇكپ قۇنى تومەن (200 ەۋروعا دەيىن) تاۋارلاردى رەسىمدەگەنى ءۇشىن كەدەندىك الىمنىڭ نولدىك مولشەرلەمەسىن بەلگىلەۋگە قول جەتكىزدى. ۇكىمەتتىڭ ءتيىستى قاۋلىسى تامىزدا قابىلداندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەسكە سالساق، جىل باسىنان بەرى كولىك پروكۋراتۋراسىنىڭ نۇسقاماسى بويىنشا سىرتقى ەكونوميكالىق قىزمەتكە قاتىسۋشىلار تاۋارعا دەكلاراسيا رەتىندە وڭايلاتىلعان تارتىپپەن بەرىلەتىن ءاربىر تىزبە مەن ءوتىنىش ءۇشىن، ياعني، بۇرىن ەشقاشان تولەنبەگەن نارسە ءۇشىن 20 مىڭ تەڭگەدەن كەدەندىك الىم تولەۋگە ءماجبۇر بولدى.
وسى جايت كۋرەرلىك كومپانيالاردىڭ قۇنى تومەن جۇگى بويىنشا بارلىق ەكسپورتتىق-يمپورتتىق وپەراسيالارىن توقتاتتى جانە وتاندىق ينتەرنەت-دۇكەندەردىڭ جۇمىسىنا كەرى اسەر ەتتى.
«ەگەر كەدەندىك الىمدى ءبىر دەكلاراسيا دەڭگەيىندە ەمەس، جەكە جونەلتپە قۇجات سانى بويىنشا تولەيتىن بولسا، وندا الىم مولشەرى وسەدى. مىسالى، ەگەر ەكسپرەسس جەتكىزىلىمنىڭ ءبىر پارتياسىندا 500 جونەلتپە قۇجات بولسا، وندا كەدەن الىمى 20 مىڭ تەڭگە ورنىنا 10 ملن تەڭگە بولادى. بۇل حالىقارالىق ستاندارتتارعا قايشى. سوندىقتان ماسەلەنى شەشۋ ءۇشىن ءبىز بىردەن بىرنەشە مەملەكەتتىك ورگانمەن جينالىس وتكىزدىك. كەزدەسۋدە مەملەكەتتىك ورگانداردىڭ ارەكەتى زاڭسىز ەكەنىن دالەلدەپ، ۇكىمەت قاۋلىسىنا وزگەرىستەر ەنگىزۋدى ۇسىندىق. ۇسىنىسىمىزدىڭ ەسكەرىلگەنىنە قۋانىشتىمىز. ەندى كۋرەرلىك كومپانيالار مەن ينتەرنەت دۇكەندەر الاڭسىز جۇمىس ىستەي الادى»، – دەدى «اتامەكەن» ۇكپ كەدەندىك اكىمشىلىكتەندىرۋ دەپارتامەنتىنىڭ ديرەكتورى دينا ماماشيەۆا.
«DHL Express قازاقستان» باس ديرەكتورى ەۆگەنيي باگداشكيننىڭ ايتۋىنشا، كۋرەرلىك كومپانيا سالەمدەمەلەردى شەتەلدەن جەتكىزۋ، سونىڭ ىشىندە ينتەرنەت-دۇكەندەر سياقتى ماڭىزدى سەگمەنتتە جۇمىسىن جالعاستىرىپ جاتقانىن حابارلادى.
«كەدەندىك تالاپتاردىڭ اشىقتىعى مەن بولجامدىلىعى ەكسپرەسس-بيزنەس ءۇشىن اسا ماڭىزدى. ويتكەنى بۇل بيزنەس بەلگىلى ءبىر ۋاقىت ىشىندە تۇتىنۋشىلارعا تاۋارلاردى جەتكىزۋى كەرەك. ءبىز ۇلتتىق پالاتانىڭ كومەگىمەن كەدەندىك دەكلاراسيالاردىڭ وڭايلاتىلعان فورمالارىن رەسىمدەۋدە الىمداردى تولەۋ تۋرالى تالاپ تۇرىندەگى كەدەرگىنى ەڭسەرە العانىمىزعا قۋانىشتىمىز»، – دەپ اتاپ ءوتتى سپيكەر.