ءماجىلىس ونلاين پلاتفورمالاردىڭ جۇمىسىنا قاتىستى زاڭ جوباسىن قاراۋعا الدى.
بۇل تۋرالى دەپۋتات ايدوس سارىم ءمالىم ەتتى، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
«بۇگىن ءماجىلىس 7 دەپۋتات ۇسىنعان «ونلاين پلاتفورمالار» مەن «ونلاين-جارناما» تۋرالى زاڭ جوباسىن قاراۋعا الدى. ونىڭ نەگىزىندە بولاشاقتا سالىق كودەكسى سياقتى اۋقىمدى قۇجاتتاردىڭ دايىندىعىن قامتاماسىز ەتەدى. ونىڭ ىشىندە كوپتەگەن جاڭا ۇعىمدار بار. ماقساتتى، تارگەتتىك جارناما دەگەن تۇسىنىك ەنگىزىلەدى. وسىنىڭ نەگىزىندە مەملەكەتتىك، سالىق، قارجى ورگاندارى ءتيىستى ورگاندارمەن جۇمىس ىستەۋگە مۇمكىندىك الادى. بۇل - ادىلەتتىك ماسەلەسى. مىسالى، جۋرناليستەر ەتكەن ەڭبەگى ءۇشىن سالىق تولەيدى. ال كوپ ازامات زاڭداعى ولقىلىقتى پايدالانىپ، كونۆەرتپەن اقشا الۋعا جوق ەمەس. بۇل زاڭ قابىلداناتىن بولسا، ونلاين-پلاتفورمالاردىڭ جۇمىسىن رەتتەيدى»، - دەدى ول.
ايدوس سارىمنىڭ سوزىنشە، بەلگىلى ءبىر قولدانۋشىنىڭ سانى اسقان سوڭ، الەۋمەتتىك پلاتفورما ءبىرقاتار ماسەلەنى قامتۋى كەرەك بولادى.
«ياعني، كەز كەلگەن الەۋمەتتىك جەلىنىڭ كونتەنتى ورىس تىلىندە جازىلىپ، يسپان تىلىنە اۋدارىلسا، قازاق تىلىنە دە سولاي اۋدارىلۋى كەرەك. قازاق تىلىندە زاڭسىز كونتەنت بولسا، وزدەرى مودەراسيا جاساي الۋى كەرەك. ياعني، قازاقشا بىلەتىن مامان بولۋى كەرەك. جالعان اقپارات بەرۋشىلەردى جۇمسارتۋ تۋرالى وزگەرىستەر ەنگىزىلەدى. ءقازىر كەيبىر ازامات حالىقتان ملرد-تاعان قاراجاتتى قايىرىمدىلىق ءۇشىن جيناپ جاتادى. ول قايدا كەتكەنىن ەشكىم ەسەپتەمەيدى، سالىق تا تولەنبەيدى. قوعامدىق تىڭداۋلار وتكىزەمىز. كەيىن جۇمىس توبى قۇرىلۋى كەرەك»، - دەدى ول.