ەلىمىزدە ءبىرىنشى سىنىپقا قۇجات قابىلداۋ اياقتالدى

ەل بويىنشا 400 مىڭ اتا-انا ءوتىنىش بەرگەن.

بۇگىن ءبىرىنشى سىنىپقا قۇجات قابىلداۋ ناۋقانى اياقتالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

وقۋ-اعارتۋ مينيسترلىگىنىڭ باسپا ءسوز قىزمەتىنەن ءمالىم ەتىلگەندەي، قۇجاتتاردى قابىلداۋ تولىق 4 ايعا، ياعني 1 ساۋىردەن 1 تامىزعا دەيىن سوزىلدى. وسى ۋاقىت ىشىندە قازاقستاندىقتار شامامەن 400 مىڭ ءوتىنىش بەرىپ ۇلگەردى. بالالاردىڭ 70%-دان استامى مەملەكەتتىك تىلدە وقۋدى تاڭدادى. وتىنىشتەردى قابىلداۋ ءتارتىبى اۆتوماتتاندىرىلعان جانە اتا-انالار قۇجاتتاردى ءداستۇرلى فورماتتا دا، ونلاين فورماتتا دا تاپسىرا الدى. وتىنىشتەردىڭ 80%-ى ەلەكتروندى فورماتتا بەرىلدى.

«وقۋ جىلىنىڭ باستالۋىنا ءبىر اي قالدى. ەندى مەكتەپتەر وقۋ-تاربيە ءۇردىسىن ساپالى دايىنداۋ مەن ۇيىمداستىرۋعا، سىنىپ جيىنتىقتارىن قالىپتاستىرۋعا كىرىسەدى. جۇرگىزىلەتىن جۇمىستار ءالى جەتكىلىكتى جانە ول ءۇشىن مەكتەپتەر تامىز ايىن ءتيىمدى پايدالانادى. ءبىرىنشى سىنىپ وقۋشىلارىنىڭ باسىم بولىگى اباي، شىعىس قازاقستان، باتىس قازاقستان، قوستاناي جانە قاراعاندى وبلىستارىندا، سونداي-اق نۇر-سۇلتان، الماتى جانە شىمكەنت قالالارىندا بايقالادى. بالالاردى قازاق تىلىندە وقىتاتىن سىنىپتارعا قامتۋدىڭ جوعارى كورسەتكىشى قىزىلوردا (89،6%)، ۇلىتاۋ (86،6%)، ماڭعىستاۋ (86،2%)، جامبىل (80،4%) وبلىستارىندا بايقالادى»، - دەيدى ق ر وقۋ-اعارتۋ مينيسترلىگى مەكتەپكە دەيىنگى جانە ورتا ءبىلىم كوميتەتى ءتوراعاسى گۇلميرا كارىموۆا.