قىلمىستىق ىستەر كورسەتكىشى 7،6 پايىزعا تومەندەگەن
ق ر ىشكى ىستەر مينيسترلىگى سوڭعى اپتادا ەل اۋماعىندا تىركەلگەن قىلمىستار تۋرالى باياندادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىر اپتا ىشىندە 3266 قىلمىس جاسالدى، ونىڭ 2033ء-ى تاۋلىك ىشىندە اشىلدى. پوليسيا قىزمەتكەرلەرى 6 كىسى ءولتىرۋدى، 7 ولىمگە اكەپ سوققان دەنساۋلىققا قاساقانا اۋىر زيان كەلتىرۋدى، 2 قاراقشىلىق، 38 توناۋ جانە 463 بوتەن مۇلىكتى ۇرلاۋ قىلمىسىن «ءىزىن سۋىتپاي» اشقان»، - دەدى ق ر ءىىم باسپا ءسوز قىزمەتىنىڭ وكىلى شۇعىلا تۇرلىبەك مينيسترلىك ۇيىمداستىرعان بريفينگتە.
سونداي-اق، وتكەن اپتادا مەملەكەت باسشىسى قاسىم-جومارت توقايەۆ ىشكى ىستەر ءمينيسترى مارات احمەتجانوۆتى قابىلدادى. پرەزيدەنتكە ەلىمىزدەگى كريمينوگەندىك جاعداي تۋرالى مالىمەت بەرىلدى. ۆەدومستۆو باسشىسىنىڭ ايتۋىنشا، قىلمىستىق ىستەر كورسەتكىشى 7،6 پايىزعا تومەندەگەن. سونىڭ ىشىندە دەنساۋلىققا اۋىر زاقىم كەلتىرۋ، قاراقشىلىق، توناۋ، مال ۇرلىعى، بۇزاقىلىق، الاياقتىق جانە زورلاۋ دەرەكتەرى ايتارلىقتاي ازايعان.
«مينيستر قاڭتار وقيعاسى كەزىندە جاسالعان قىلمىستاردى تەرگەپ-تەكسەرۋ، كىنالىلەردى انىقتاپ، جاۋاپقا تارتۋ، ۇرلانعان قارۋلاردى زاڭسىز اينالىمنان الۋ جۇمىستارى جونىندە ەسەپ بەردى. مەملەكەت باسشىسى قاۋىپسىزدىك ماسەلەلەرىن قوعاممەن سەرىكتەستىك ورناتۋ ارقىلى شەشۋگە نەگىزدەلگەن پوليسيانىڭ سەرۆيستىك مودەلىن ەنگىزۋ بارىسىمەن تانىستى. مارات احمەتجانوۆ پرەزيدەنتكە ىشكى ىستەر مينيسترلىگىنىڭ قىزمەتىن بيۋروكراتيادان ارىلتۋ، سيفرلاندىرۋ جانە جۇمىس ۇدەرىسىن اۆتوماتتاندىرۋ، ىشكى راسىمدەردى وڭتايلاندىرۋ جونىندە باياندادى»، - دەدى ش.تۇرلىبەك.