مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن كەڭەسىندە ينۆەستيسيالىق جوبالاردىڭ سيفرلىق دەرەكتەر بازاسىن قۇرۋدى تاپسىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جالپى، ۇكىمەت پەن اكىمدەر ينۆەستيسيا تارتۋ باعىتىنداعى جۇمىستى ەداۋىر جانداندىرۋى كەرەك. مەن بۇل تۋرالى ايتتىم، ءبىراق ەرەكشە ماڭىزدىلىعىن ەسكەرە وتىرىپ، قايتالايمىن. ءيا، بىلتىر تارتىلعان تىكەلەي شەتەلدىك ينۆەستيسيانىڭ كولەمى سوڭعى 10 جىلداعى رەكوردتىق مولشەرگە جەتتى – 28 ميلليارد دوللار تارتىلدى.
پرەزيدەنت تارتىلعان ينۆەستيسيالاردىڭ 43%-دان استامى ادەتتەگىدەي تاۋ-كەن سەكتورىنا جۇمسالىپ وتىرعانىن اتاپ ءوتتى.
«ال وڭدەۋ ونەركاسىبىنە سالىنعان ينۆەستيسيالار جالپى ينۆەستيسيانىڭ بەستەن ءبىر بولىگىن عانا قۇرادى. سوندىقتان بىزگە يكەمدى، ءبىزدىڭ قاجەتتىلىكتەرىمىز بەن شىنايى جاعدايىمىزعا بەيىمدەلگەن سالىق ساياساتى جانە مەملەكەتتىك قىزمەتشىلەردىڭ ۇتقىرلىعى مەن قارجىلاي تازالىعى كەرەك. ينۆەستيسيالاردى تارتۋدىڭ ءتيىمدى جۇيەسىن قۇرۋ قاجەت. ەڭ باستىسى ينۆەستيسيالار ءسىڭىمدى بولۋى قاجەت. شەتەلدىك ينۆەستورلارعا ناقتى جوبالارعا ينۆەستيسيا سالۋدى، دايىن پاكەتتىك شەشىمدەردى ۇسىنۋ كەرەك. ۇكىمەت ناقتى سالالارداعى ءىرى شەتەلدىك سەرىكتەستەرمەن ناتيجەلى جۇمىس ىستەپ وتىر. ءبىراق بۇل باعىتتاعى جۇمسالىپ جاتقان كۇش-جىگەردى ارتتىرۋ قاجەت. ينتەراكتيۆتى ينۆەستيسيالىق كارتا قۇرىپ، ءار ءوڭىردىڭ ينۆەستيسيالىق جوبالارى مەن ينۆەستورلارى تۋرالى دەرەكتەردىڭ سيفرلىق بازاسىن ىسكە قوسۋ قاجەت»، – دەدى مەملەكەت باسشىسى.