نەكە بۇزۋ ەرەجەلەرىنە كەيبىر وزگەرىستەر ەنگىزىلمەك
ادىلەت مينيسترلىگى ازاماتتىق حال اكتىلەرىن مەملەكەتتىك تىركەۋدى ۇيىمداستىرۋ قاعيدالارىنا وزگەرىستەر ەنگىزىلەتىن بۇيرىق جوباسىن دايىندادى، دەپ حابارلايدى Almaty-akshamy.kz
جاڭا وزگەرىستەر بالالارى جوق ەرلى-زايىپتىلاردىڭ اجىراسۋ ءراسىمى تۋرالى بولماق.
ول ءۇشىن نەكەنى بۇزۋ تۋرالى ءوتىنىش بەرۋ قاجەت، وندا نەكەنى بۇزۋعا جانە ولاردا كامەلەتكە تولماعان بالالاردىڭ بولماۋىنا ءوزارا كەلىسىمدى راستاۋ قاجەت.
نەكەنى بۇزۋدى مەملەكەتتىك تىركەۋدى تىركەۋشى ورگان نەكەنى بۇزۋ تۋرالى بىرلەسكەن ءوتىنىش بەرىلگەن كۇننەن باستاپ ءبىر اي مەرزىم وتكەننەن كەيىن نەكەنى بۇزۋشىلاردىڭ جەكە قاتىسۋىمەن جۇرگىزەدى.
مەرزىمنىڭ ءوتۋى ءوتىنىش بەرىلگەننەن كەيىنگى كەلەسى كۇنى باستالىپ، كەلەسى ايدىڭ ءتيىستى كۇنىندە اياقتالادى. ەگەر بۇل كۇن جۇمىس كۇنى بولماسا، وندا ودان كەيىنگى جۇمىس كۇنى مەرزىمنىڭ اياقتالعان كۇنى بولىپ ەسەپتەلەدى. ءبىر ايلىق مەرزىمدى قىسقارتۋ مۇمكىن ەمەس.
نەكەنى بۇزعىسى كەلەتىن ەرلى-زايىپتىلار تىركەۋشى ورگانعا جەكە باسىن كۋالاندىراتىن قۇجاتپەن نەمەسە نەكەنى بۇزۋدى تىركەۋدىڭ بەلگىلەنگەن كۇنى سيفرلىق قۇجاتتار سەرۆيسىنەن ەلەكتروندىق قۇجاتپەن كەلۋى قاجەت ەكەندىگى كورسەتىلەدى.
ەگەر ەرلى-زايىپتىلار وزدەرى بەلگىلەگەن كۇنى كەلە الماسا، ولار تىركەۋشى ورگانعا نەكەنى بۇزۋ تۋرالى وتىنىشپەن قايتا جۇگىنە الادى جانە ولارعا نەكەنى بۇزۋدى تىركەۋ ءۇشىن قايتادان ءبىر اي مەرزىم تاعايىندايدى.
ەگەر ەرلى-زايىپتىلاردىڭ بىرەۋى نەكەنى بۇزۋدى تىركەۋ ءۇشىن تىركەۋشى ورگانعا قايتا ءوتىنىش بەرگەننەن كەيىن كەلە الماسا، وندا نەكەنى بۇزۋ ول بولماعان كەزدە جۇرگىزىلۋى مۇمكىن. ول ءۇشىن ونىڭ نەكەنى بۇزۋعا نوتاريالدى كۋالاندىرىلعان كەلىسىمىن ۇسىنۋ قاجەت.
نەكەنى «ازاماتتارعا ارنالعان ۇكىمەت» مەملەكەتتىك كورپوراسياسى ارقىلى بۇزۋعا بولادى. كامەلەتكە تولماعان بالالارى جوق ەرلى-زايىپتىلار پورتالعا جۇگىنگەن كەزدە:
- پورتالدىڭ ەسەپتىك جازباسىنا ءوتىنىش بەرۋشىنىڭ ەسق-مەن نەمەسە ۇيالى بايلانىس وپەراتورى ۇسىنعان ءبىر رەتتىك پارولمەن كۋالاندىرىلعان ەلەكتروندىق ءوتىنىش؛
- ازاماتتىق حال اكتىلەرىن تىركەۋ تۋرالى مالىمەتتەر.
ەگەر جۇبايى جوعالعان نەمەسە سوتتالعان بولسا، كەلەسى قۇجاتتاردى ۇسىنۋ قاجەت:
- نەكەنى بۇزۋ تۋرالى ءوتىنىش؛
- جەكە باسىن كۋالاندىراتىن قۇجات نەمەسە سيفرلىق قۇجاتتار سەرۆيسىنەن ەلەكتروندىق قۇجات؛
- نەكە قيۋ (ەرلى-زايىپتى بولۋ) تۋرالى كۋالىك؛
- بيۋدجەتكە مەملەكەتتىك باجدىڭ تولەنگەنىن راستايتىن قۇجات؛
- جۇبايىن حابار-وشارسىز كەتكەن نە ارەكەتكە قابىلەتسىز دەپ تانۋ تۋرالى زاڭدى كۇشىنە ەنگەن سوت شەشىمى نەمەسە قىلمىس جاساعانى ءۇشىن كەمىندە ءۇش جىل مەرزىمگە باس بوستاندىعىنان ايىرۋ تۋرالى سوت ۇكىمى تۋرالى مالىمەتتەر؛
- ءوتىنىش بەرۋشىنىڭ وكىلى جۇگىنگەن جاعدايدا نوتاريالدى كۋالاندىرىلعان سەنىمحات.
قۇجات 18 اقپانعا دەيىن «اشىق نقا» سايتىندا جاريا تالقىلاۋ ءۇشىن ورنالاستىرىلعان.