ەلىمىزدە بالالاردىڭ كوبى التىن ۋاقىتتارىن تەلەفونعا ەكرانىنا ۇڭىلۋمەن وتكىزەدى

تەلەفونعا تەلمىرگەن بالالار كوبەيىپ كەلەدى. ەلىمىزدە بالالاردىڭ 33،9% كۇنىنە 2 جانە ودان دا كوپ ساعاتىن ءتۇرلى قۇرىلعىلار ەكرانىنىڭ الدىندا وتكىزەدى

مۇنداي دەرەكتى «قازاقستانداعى بالالار سەمىزدىگىنىڭ تارالۋىن زەرتتەۋ» كونفەرەنسياسىندا ق ر دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ ۇلتتىق ورتالىعىنىڭ باسقارما ءتوراعاسىنىڭ مىندەتىن اتقارۋشى جانار قالماقوۆا كەلتىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«زەرتتەۋ ناتيجەلەرىنەن بەلگىلى بولعانداي، بالالاردىڭ 33،9% كۇن سايىن ەكى جانە ودان دا كوپ ساعاتىن ءتۇرلى قۇرىلعىلار ەكرانىنىڭ الدىندا وتكىزەدى. بۇل كورسەتكىش قالالاردا 37،2 پايىزدى، اۋىلداردا 30 پايىزدى قۇراپ وتىر. وسىنىڭ سالدارىنان بالا كوپ قيمىلداماي، كوزىنىڭ كورۋ قابىلەتى ناشارلايدى. سوندىقتان بالالاردىڭ تەلەديدار، تەلەفون، كومپيۋتەر نەمەسە پلانشەتتەن ءتۇرلى مۋلتفيلم كورىپ، ويىن ويناۋلارىن شەكتەۋ كەرەك»، - دەدى ول.

جانار قالماقوۆانىڭ دەرەگىنشە، ەلىمىزدە وقۋشىلاردىڭ 77،2 پايىزى مەكتەپكە جاياۋ نەمەسە ۆەلوسيپەدپەن بارادى. كۇنىنە 1 ساعات نەمەسە ودان دا كوپ ۋاقىت فيزيكالىق بەلسەندى بالالاردىڭ ۇلەسى – 86،8 پايىز.

«مەكتەپتەردىڭ 90،8 پايىزى بالالارعا ساباقتان تىس ۋاقىتتا ءبىلىم ورداسىنىڭ اشىق سپورتتىق الاڭدارىندا ويناۋعا رۇقسات بەرگەن. ال ىشتەگى سپورت زالدا ساباقتان تىس ۋاقىتتا ويناۋعا مەكتەپتەردىڭ 88،9 پايىزى مۇمكىندىك بەرىپ وتىر»، - دەدى ق ر دسم قوعامدىق دەنساۋلىق ساقتاۋ ۇلتتىق ورتالىعىنىڭ باسقارما ءتوراعاسىنىڭ مىندەتىن اتقارۋشى.