قازاقستاندا جىل سايىن 600-دەي بالا قاتەرلى ىسىككە شالدىعادى.
ولاردىڭ 40 پايىزىنا «اق قان» دياگنوزى قويىلادى. بۇل كورسەتكىش قازاقستاندا سوڭعى جەتى جىلدا ساقتالىپ وتىر. بۇل تۋرالى الماتىدا وتكەن حالىقارالىق كونفەرەنسيادا ايتىلدى، دەپ حابارلايدى Almaty-akshamy.kz
ءىس-شارا پەدياتريا جانە بالالار حيرۋرگياسى عىلىمي ورتالىعىنىڭ 90 جىلدىعىنا وراي ۇيىمداستىرىلدى. دارىگەرلەردىڭ ايتۋىنشا، بۇگىندە اۋىر دەرتكە شالدىققانداردى ەمدەۋ تيىمدىلىگى 70 پايىزعا دەيىن جەتكەن. مامانداردىڭ ايتۋىنشا، ەلىمىزدە بالالاردى ەمدەيتىن ونكولوگ-گەماتولوگ تاپشى. جيىندا وسى ماسەلەنى شەشۋ جولدارى دا تالقىلاندى.
«اۋىر ناۋقاستاردىڭ جاعدايىن جاقسارتۋعا ارنالعان باعىتتا، سولاردىڭ ەمدەۋ جۇمىستارىن ۇيىمداستىرۋ ماقساتتا وسى جەردە باسىمىز قوسىلىپ وتىر. پەدياتريا فاكۋلتەتىندەگى بالالاردىڭ العاشقىلارى بيىل التىنشى كۋرستا وقىپ ءجۇر. سول بالالار التىنشى كۋرستى بىتىرگەننەن كەيىن تولىعىمەن پەدياتريا ماماندىعىنا بارادى»، - دەيدى پەدياتريا جانە بالالار حيرۋرگياسى ورتالىعىنىڭ باسقارما ءتوراعاسى اباي قۇسايىنوۆ.