ەلىمىزدە بالا تۋۋ كوبەيگەن

بىلتىر 412 مىڭ ءسابي دۇنيەگە كەلدى. 

سوڭعى 5 جىلدا رەسپۋبليكادا بالا تۋۋ كورسەتكىشى ارتقانى بايقالىپ وتىر، دەپ حابارلايدى Almaty-akshamy.kz دسم باسپا ءسوز قىزمەتىنە سىلتەمە جاساپ.

ال 2021 جىلى 446 مىڭ مىڭ نارەستە دۇنيەگە كەلگەن.

مينيسترلىكتىڭ مالىمەتىنشە، تۋا بىتكەن اقاۋلارى بار جاڭا تۋعان نارەستەلەردىڭ ءومىر ءسۇرۋ دەڭگەيى 86%-دى قۇرادى. جىل سايىن ورتا ەسەپپەن تۋا بىتكەن اقاۋلارى بار 1500 جاڭا تۋعان نارەستە حيرۋرگيالىق ەم الادى.

رەسپۋبليكا بويىنشا بالالارعا مەديسينالىق كومەك كورسەتۋگە  3 232 پەدياتر، 773 نەوناتولوگ جانە 1 395 بالالار انەستەزيولوگ-رەانيماتولوگ دارىگەرلەرى جۇمىلدىرىلعان.

دسم ەلىمىزدىڭ ورتالىق ازيادا سابيلەرگە تۋعاننان باستاپ كارديوحيرۋرگيالىق وتا جاسايتىن جالعىز مەملەكەت ەكەنىن ەسكە سالدى.

«بىلتىر تۋا بىتكەن جۇرەك اقاۋلارى بار بالالارعا 1800-دەن استام اشىق جۇرەككە وتا جاسالدى، ونىڭ 75%-ى – ءبىر جاسقا دەيىنگى بالالار. شەبەرلىك سىنىپتارى اياسىندا گەرمانيا مەن تۇركيادان شەتەلدىك مامانداردى تارتا وتىرىپ، كۇردەلى اقاۋلارى بار 24 بالاعا وپەراسيا جاسالدى. اسا اۋىر جاعدايلاردا بالالاردىڭ ءومىرىن قۇتقارۋ ءۇشىن ەلدە تەلەمەديسينالىق تەحنولوگيالار مەن مەديسينالىق اۆياسيا جۇزەگە اسىرىلدى. ساناۆياسيانىڭ 497 ۇشۋى، ونىڭ ىشىندە جاڭا تۋعان نارەستەلەرگە 271 ۇشۋ ورىندالدى، 1072 بالاعا مەديسينالىق كومەك كورسەتىلدى»، - دەلىنگەن مينيسترلىك تاراتقان اقپاراتتا.

مينيسترلىك ەلىمىزدە 11 زاماناۋي پەريناتالدىق ورتالىق سالۋ ماسەلەسى بويىنشا جوبالاۋ-سمەتالىق قۇجاتتامانى ازىرلەۋ جۇمىستارى باستالاتىنىن حابارلادى.

«بۇگىندە جۇمىس ىستەپ تۇرعان كلينيكالاردىڭ بازاسىندا 5 ءوڭىرارالىق بالالار كارديوحيرۋرگياسى ورتالىعىن قۇرۋ بويىنشا جۇمىستار جۇرگىزىلىپ جاتىر.  بالالارعا ارنالعان 13 ەرتە ارالاسۋ ورتالىعىن، 17 اۋداندىق جانە 6 وبلىستىق وڭالتۋ ورتالىعىن اشۋ جوسپارلانعان»، - دەلىنگەن دسم باسپا ءسوز قىزمەتىنىڭ مالىمەتىندە.